क्रीडा व सांस्कृतिक स्पर्धेच्या आयोजनात जेवणावरून वाद; चार शिक्षक निलंबित..

नागपूर :-क्रीडा व सांस्कृतिक स्पर्धेच्या आयोजनात जेवणावरून वाद घालणे चार शिक्षकांना चांगलेच महागात पडले आहे.विशेष म्हणजे,नागपूर जिल्हा परिषदेचे मुख्य कार्यकारी अधिकारी विनायक महामुनी यांनी दुसऱ्याच दिवशी शिक्षकांच्या निलंबनाचे आदेश दिले.निलंबित करण्यात आलेल्या शिक्षकांमध्ये हिंगणा पंचायत समितीअंतर्गत जिल्हा परिषद प्राथमिक शाळा तांडा येथील सहाय्यक शिक्षक मनोज मानकर, कामठी पंचायत समिती अंतर्गत जिल्हा परिषद प्राथमिक शाळा गुमथी येथील सहाय्यक शिक्षक चंद्रशेखर शिंदे,कामठी पं.स.अंतर्गत जि.प.प्राथमिक शाळा ऐकर्डीचे सहाय्यक शिक्षक रमेश चाकुलकर व जि.प.प्रा.शाळा खसाळा येथील सहा.शिक्षक मनीष पोराटे यांचा समावेश आहे.तर इखार नामक शिक्षकाला कारणे दाखवा नोटीस बजावण्यात आली आहे.

नागपूरच्या शासकीय कृषी महाविद्यालय परिसर व डॉ.बाबासाहेब आंबेडकर आंतरराष्ट्रीय कन्व्हेंशन सेंटर येथे १७ ते १९ फेब्रुवारी दरम्यान जिल्हा परिषदेतील कर्मचारी आणि अधिकाऱ्यांच्या क्रीडा व सांस्कृतिक स्पर्धा पार पडल्या.दरम्यान, कर्मचाऱ्यांसाठी जेवणाची व्यवस्था करण्यात आली होती.परंतु,पाच शिक्षकांनी जेवणावरून गोंधळ घातल्याची बाब नागपूर जिल्हा परिषदेचे मुख्य कार्यकारी अधिकारी विनायक महामुनी यांच्या निदर्शनास आली.सदरचा प्रकार हा अशोभनीय असल्याने मुख्य कार्यकारी अधिकाऱ्यांनी तात्काळ चार शिक्षकांचे निलंबन केल्याने शिक्षण विभागात एकच खळबळ उडाली आहे.