कुख्यात अंडरवर्ल्ड डॉन अरुण गवळीची तब्बल १८ वर्षांनी जामिनावर सुटका..!

मुंबईतील घाटकोपर येथे २००७ साली शिवसेनाचे नगरसेवक कमलाकर जामसांडेकर यांची त्यांच्या राहत्या घरी भरदिवसा निघृण हत्या करण्यात आली होती.या थरारक हत्याकांडामुळे संपूर्ण मुंबई हादरली होती आणि याच प्रकरणात अंडरवर्ल्ड डॉन अरुण गवळीला मुंबई सत्र न्यायालयाने २०१२ जन्मठेपेची शिक्षा सुनावली गेली होती.गेल्या १८ वर्षांपासून गवळी नागपूर मध्यवर्ती कारागृहात शिक्षा भोगत होता.अनेक वर्षांच्या कायदेशीर लढ्यानंतर सर्वोच्च न्यायालयाने अखेर त्याला जामीन मंजूर केला.सर्वोच्च न्यायालयाने जामीन मंजूर केला असला तरी त्यासंदर्भातील अटी आणि शर्ती निश्चित करण्याची जबाबदारी मुंबई सत्र न्यायालयावर सोपवण्यात आली होती.या न्यायालयाने ठरवलेल्या अटी-शर्ती औपचारिकरित्या नोंदवल्यानंतरच गवळीच्या मार्गातला शेवटचा कायदेशीर अडसर दूर झाला.मुंबई सत्र न्यायालयातून आलेल्या जामिनासंदर्भातील आदेशाची प्रत नागपूर मध्यवर्ती कारागृह प्रशासनाला मिळाल्यावर औपचारिक कार्यवाही पूर्ण करण्यात आली.त्यानंतर आज बुधवारी अरुण गवळीची जामिनावर सुटका करण्यात आली.प्रकरणाचा अंतिम निर्णय हा फेब्रुवारी २०२६ मध्ये  होणार असून यावर अरुण गवळीचे भवितव्य ठरणार आहे.