ऐन सणाच्या दिवशीच नाल्यात वाहून गेलेल्या चिमुकल्याचा आढळला मृतदेह..!

गडचिरोली :-जिल्ह्याच्या भामरागड तालुक्यात धक्कादायक घटना उघडकीस आली आहे.पोळा सणानिमित्त शासकीय आश्रम शाळेतून घरी आलेल्या चिमुकल्याचा नाल्यात वाहून गेल्याने दुर्दैवी मृत्यू झाल्याची घटना आज,शुक्रवार २२ ऑगस्ट रोजी सकाळच्या सुमारास उघडकीस आली आहे.रिशान प्रकाश पुंगाटी वय ६ वर्षे रा.कोयर,ता.भामरागड, जि.गडचिरोली असे मृत पावलेल्या मुलाचे नाव असून तो इयत्ता पहिल्या वर्गात शासकीय आश्रम शाळा लाहेरी येथे शिकत होता.

पोळा सण असल्याने रिशान हा आश्रम शाळेतून घरी परतला होता.त्याचे वडील प्रकाश पुंगाटी यांनी त्याला सणासाठी गावाकडे घेऊन आले होते.अश्यातच गुरुवार २१ ऑगस्ट रोजी रिशान हा खेळता-खेळता गावानजीक असलेल्या नाल्याजवळ गेला.सायंकाळ होऊनही तो घरी परतला नसल्याने गावातील नागरिकांनी त्याचा शोध घेतला.मात्र,रिशानचा कुठेही थांगपत्ता लागलेला नसल्याने परत आज शुक्रवारी सकाळच्या सुमारास महसूल प्रशासनासह ग्रामस्थांच्या मदतीने शोधमोहीम राबवली असता,गावानजीक असलेल्या नाल्यात चिमुकल्या रिशानचा मृतदेह आढळून आला.त्यामुळे कुटुंबीयांना मोठा धक्का बसला.ऐन पोळा सणाच्या दिवशीच मृतदेह आढळून आल्याने ग्रामस्थांच्या आनंदावर एकप्रकारे विरजण पडले.