उमरेड एमआयडीसीत स्फोट; पाच कामगारांचा मृत्यू..

नागपूर :-जिल्ह्याच्या उमरेड येथील महाराष्ट्र औद्योगिक विकास महामंडळ वसाहत स्थित असलेल्या एमएमपी इंडस्ट्रीज लिमिटेड कंपनीत काल,शुक्रवारी ११ एप्रिलला सायंकाळच्या सुमारास भीषण स्फोट झाला. सायंकाळच्या शिफ्टमध्ये जवळपास अंदाजे १५० कामगार कामावर होते.स्फोट झाल्यानंतर आगीचा भडका उडाला.दरम्यान,कंपनीतील कामगार आपला जीव मुठीत घेऊन बाहेर धावत सुटले.यामुळे अनेक कामगार थोडक्यात बचावले.मात्र,यात ११ कामगार गंभीर जखमी झाले.यातील चौघांची प्रकृती चिंताजनक होती. अशातच आता स्फोटातील जखमी कामगारांपैकी पाच कामगारांचा मृत्यू झाला आहे.उमरेड एमआयडीसीत एमएमपी ही ॲल्युमिनियम फॉइल आणि पावडर तयार करणारी कंपनी आहे. ॲल्युमिनियम फॉइल आणि पावडरचा वापर पॅकेजिंगसाठी करण्यात येतो.मात्र,अचानकपणे झालेल्या स्फोटामुळे अनेकांची धांदल उडाली होती.मध्यरात्री १ वाजतानंतरही आगीवर नियंत्रण मिळविण्यासाठी अग्निशमन दलाकडून शर्थीचे प्रयत्न सुरू होते.रात्री उशिरा जिल्हाधिकारी डॉ.विपीन इटनकर आणि पोलिस अधीक्षक हर्ष पोद्दार यांनी घटनास्थळाची पाहणी केली.सायंकाळी कंपनीत स्फोट झाल्याची माहिती मिळताच पोलिस यंत्रणा, अग्निशमन दलाने घटनास्थळी धाव घेत गंभीर जखमी झालेल्या कामगारांना प्रारंभी उपचारासाठी उमरेडच्या खासगी रुग्णालयात व नागपूरच्या शासकीय वैद्यकीय महाविद्यालय व रुग्णालयात दाखल केले होते.त्यानंतर

रात्री उशिरा पर्यंत सर्वच जखमी कामगारांना नागपूर येथे हलविण्यात आले होते.