आता राज्यातील अंगणवाड्यांमध्ये बालकांकरिता नवे अभ्यासक्रम..

उद्रेक न्युज वृत्त :-अंगणवाड्यांमध्ये तीन ते सहा वर्षे वयोगटातील बालकांकरिता नवीन अभ्यासक्रमाच्या अंमलबजावणीचा निर्णय राज्य शासनाने घेतला आहे. शालेय शिक्षण व क्रीडा विभागाने ‘आधारशिला’ या नावाने हा अभ्यासक्रम लागू केला असून याची अंमलबजावणी शैक्षणिक सत्र २०२५-२६ पासून केली जाणार आहे.आधारशिला अभ्यासक्रमाची रचना ही केंद्र शासनाच्या महिला व बालकल्याण विभागाने केली आहे.या अभ्याक्रमात ‘आधारशिला बालवाटिका-१’, ‘आधारशिला बालवाटिका-२’ व ‘आधारशिला बालवाटिका-३’ या नावाने हा अभ्यासक्रम राबविला जाणार आहे.या अभ्यासक्रमाची अंमलबजावणी करण्यासाठी मार्गदर्शक हस्तपुस्तिका,प्रशिक्षण साहित्य व आनुषंगिक साहित्य अंगणवाडी सेविका आणि पर्यवेक्षिका यांना प्रशिक्षणाच्या वेळी उपलब्ध करून दिले जाणार आहे.बालकांना पहिल्या वर्गाकरिता शैक्षणिकदृष्ट्या तयार करणे या अभ्यासक्रमाचे प्रमुख उद्दिष्ट राहणार आहे.या साहित्याच्या आधारे अंगणवाड्यांमध्ये अभ्यासक्रमाची वर्षभर अंमलबजावणी केली जाईल.त्यानंतर या साहित्याच्या उपयोगिता व परिणामकारतेचे मूल्यमापन केले जाईल.राज्य शैक्षणिक संशोधन व प्रशिक्षण परिषदेच्या संचालकांमार्फत हे मूल्यमापन केले जाणार आहे.या उपक्रमाच्या अंमलबजावणीबाबत पुढील निर्णय घेतला जाईल.यासाठी अंगणवाडी सेविकांना विशेष प्रशिक्षण दिले जाणार आहे.