आज नागपुरात कॉक्रोच जनता पार्टीचे आंदोलन.. – सप्तखंजिरीवादक प्रबोधनकार सत्यपाल महाराज होणार सहभागी..

नागपूर :-नीटच्या प्रश्नपत्रिका फुटीप्रकरणी केंद्रीय शिक्षणमंत्री धर्मेंद्र प्रधान यांनी राजीनामा द्यावा,या मागणीसाठी कॉक्रोच जनता पार्टीच्या वतीने आज, मंगळवार १६ जून २०२६ रोजी दुपारी चार वाजता नागपूरच्या संविधान चौकात आंदोलन करण्यात येणार आहे.या आंदोलनात कॉक्रोच जनता पक्षाचे संस्थापक अभिजित दीपके,सप्तखंजिरीवादक प्रबोधनकार सत्यपाल महाराज सहभागी होणार आहेत.त्याचबरोबर, वर्धा जिल्ह्यात स्पर्धा परीक्षांचे मार्गदर्शक असलेले नितेश कराळे सहभागी होणार असल्याने नागपूर शहर पोलिसांच्या वतीने तगडा पोलिस बंदोबस्त लावण्यात आला आहे.कॉक्रोच जनता पार्टीच्या मते नीटची प्रश्नपत्रिका फुटल्यामुळे देशातील परीक्षा व्यवस्थेच्या विश्वासार्हतेवर प्रश्नचिन्ह निर्माण झाले आहे.या प्रकरणात जबाबदारी निश्चित करून शिक्षणमंत्र्यांनी राजीनामा द्यावा,अशी मागणी पक्षाने केली आहे.या आंदोलनात जास्तीत जास्त नागरिकांनी सहभागी व्हावे यासाठी कॉक्रोच जनता पार्टीच्या स्थानिक पदाधिकाऱ्यांनी आणि कार्यकर्त्यांनी सोशल मीडियावर आवाहन केले आहे. तसेच शहरातील प्रमुख बाजारपेठांमध्ये पत्रके वाटून आंदोलनाची माहिती जनतेपर्यंत पोहोचविली आहे. कॉक्रोच जनता पार्टीच्या आंदोलनाला परवानगी देतांना पोलिसांनी आंदोलकांना विविध अटी घालून दिल्या असून कुठल्याही प्रकारचे प्रक्षोभक वक्तव्य,चेंगराचेंगरी, विनयभंग,नारेबाजी होणार नाही याची काळजी घेण्याची नोटीस दिली आहे.आंदोलनासाठी शंभर पोलिस अधिकारी व सहाशे पोलिसांचा बंदोबस्त आहे; असे नागपूरचे पोलिस आयुक्त डॉ.रवींद्र कुमार सिंगल स्पष्ट केले.