अखेर बँक कर्मचाऱ्यांचा संप स्थगित; बँकांचे कामकाज राहणार नियमित सुरू..

उद्रेक न्युज वृत्त :-देशभरातील बँक कर्मचारी आज, सोमवार २८ सप्टेंबर ते ३० सप्टेंबरदरम्यान तीन दिवसांच्या संपावर जाणार होते.मात्र,संपाच्या पूर्वसंध्येला काल रविवारच्या रात्री इंडियन बँक्स असोसिएशन ((आयबीए)आणि युनायटेड फोरम ऑफ बँक युनियन्स (यूएफबीयू)यांच्यात बैठक झाली.बैठकीत विविध मागण्यांवर चर्चा झाली.पाच दिवसांच्या कामकाजाचा आठवडा लागू करण्यासह विविध मागण्यांवर चर्चा करण्यासाठी भारतीय बँक संघटना(आयबीए)आणि युनायटेड फोरम ऑफ बैंक युनियन्स (यूएफबीयू)ची उच्चस्तरीय समिती तातडीने स्थापन करण्यात येणार आहे.सदरची समिती सर्व पर्यायांचा विचार करून संबंधित घटकांशी चर्चा करून ग्राहकांसह सर्वांना मान्य होईल,असा तोडगा काढण्याचा प्रयत्न करणार आहे.या बैठकीनंतर प्रस्तावित देशव्यापी बँक संप अखेर स्थगित करण्याचा निर्णय घेण्यात आला.विशेष म्हणजे,संप सुरू असता तर बँकांच्या सहामाही आर्थिक वर्षअखेरच्या कामकाजासह बँकिंग सेवांवर परिणाम होण्याची शक्यता होती.अश्यातच चर्चेअंती तोडगा निघाल्याने आजपासून बँकांचे कामकाज नियमितपणे सुरू राहणार आहे.यामुळे ग्राहकांना मोठा दिलासा मिळाला आहे.