स्फोटके बनवणाऱ्या कंपनीत भीषण स्फोट; १७ कामगारांचा मृत्यू.. – शरीर जळून खाक; मृतांची ओळख पटवणे कठीण..

नागपूर :-स्फोटके बनवणाऱ्या कंपनीत भीषण स्फोट होऊन आतापर्यंत तब्बल १७ कामगारांचा मृत्यू झाला, तर २४ कामगार गंभीर जखमी झाल्याची घटना आज, रविवार १ मार्च रोजी सकाळी सात वाजेच्या सुमारास काटोल तालुक्याच्या राऊळगाव जवळील एसबीएल कंपनीत घडली.स्फोट इतका भीषण होता की, कामगारांचे संपूर्ण शरीर जळून खाक झाले आहेत. त्यामुळे मृतांची ओळख पटवणे कठीण झाले आहे. अश्यातच आता प्रशासनाने सर्व मृतांची डीएनए प्रोफाइलिंग चाचणी करण्याचा निर्णय घेतला असून त्यासाठी अनेक कामगारांच्या नातेवाईकांचे रक्ताचे नमुने घेण्यात येत आहेत.डीएनए प्रोफाइलिंग चाचणी दोन दिवसात पूर्ण होण्याची शक्यता आहे.तोपर्यंत सर्व मृतदेह शासकीय वैद्यकीय रुग्णालयाच्या शीतगृहात ठेवण्यात येणार आहेत.यामध्ये जखमी झालेल्या कामगारांवर नागपुरातील शासकीय रुग्णालयात उपचार सुरु आहेत. तर सर्व मृत कामगारांचे पार्थिव वैद्यकीय आणि उत्तरीय  तपासणीसाठी नागपूरच्या शासकीय वैद्यकीय महाविद्यालयात रुग्णवाहिकेद्वारे नेण्यात आले आहेत. दुर्घटनेबाबत मुख्यमंत्री देवेंद्र फडणवीस आणि नागपूरचे पालकमंत्री चंद्रशेखर बावनकुळे यांनी दुःख व्यक्त केले आहे.जखमींवर तातडीने उपचार करण्यात यावेत, असे आदेशही देण्यात आले आहेत.