विदर्भातील नेता हरपला; माजी खासदार दत्ता मेघे यांचे निधन..

नागपूर :-गेल्या ४० वर्षांहून अधिक काळ सार्वजनिक जीवनात सक्रिय असलेले व राजकारण,शिक्षण आणि आरोग्य क्षेत्रात भरीव काम करणारे विदर्भातील ज्येष्ठ नेते दत्ता मेघे यांचे आज,रविवार २२ मार्च रोजी वयाच्या ९० व्या वर्षी नागपूर येथे निधन झाले.त्यांच्या निधनाबद्दल केंद्रीयमंत्री नितीन गडकरी,मुख्यमंत्री देवेंद्र फडणवीस यांनी शोक व्यक्त केला.त्यांच्या निधनाचे वृत्त कळताच नागपूरच्या खामला पांडे लेआऊट येथील निवासस्थानी सर्वपक्षीय नेते,पदाधिकारी,चाहत्यांनी गर्दी केली.

दत्ता मेघे यांचा जन्म ११ नोव्हेंबर १९३६ रोजी वर्धा जिल्ह्यातील पवनार येथे झाला.गरीब परिस्थितीतून पुढे आलेले दत्ता मेघे यांनी विदर्भातील राजकारणात महत्त्वाचे स्थान निर्माण केले.त्यांनी आपल्या कारकीर्दीची सुरुवात काँग्रेसमध्ये केली.त्यांनी वर्धा, रामटेक,नागपूर लोकसभा मतदार संघातून चार वेळा प्रतिनिधित्व केले.राज्यसभेचे सदस्य म्हणूनही काम केले.ते तीन वेळा विधान परिषद सदस्य,मंत्रीही होते.२०१४ मध्ये त्यांनी भाजपमध्ये प्रवेश केला. १९७८ मध्ये शरद पवार यांच्या नेतृत्त्वातील पुलोद सरकारमध्ये ते विदर्भातून मंत्री होते.१९९१ मध्ये त्यांनी नागपूर लोकसभा मतदारसंघातून काँग्रेसचे उमेदवार म्हणून विजय संपादन केला.यानंतर रामटेक,व वर्धा या मतदारसंघातून ते खासदार म्हणून निवडून आले.विदर्भातील तीन मतदारसंघातून खासदार म्हणून निवडून येणारे ते विदर्भातील एकमेव नेते आहेत.वर्धा येथे वैद्यकीय महाविद्यालय सुरू करून त्यांनी विदर्भात अनेक शैक्षणिक संस्था उभ्या केल्या आहेत.त्यांच्या जाण्याने सामाजिक,राजकीय व शैक्षणिक क्षेत्रात मोठी पोकळी निर्माण झाली आहे.दत्ता मेघे यांच्या पश्चात सागर मेघे व आमदार समीर मेघे ही दोन मुले,सुना,नातवंडे असा बराच मोठा आप्त परिवार आहे.