वाघ दिसताच पळत सुटले; जीव वाचवण्यासाठी धावत असतांनाच बंधाऱ्यात पडले,बाप-लेकाचा दुर्दैवी मृत्यू..

नागपूर :-जिल्ह्याच्या रामटेक तालुक्यातून एक हृदयद्रावक घटना उघडकीस आली आहे.शेतावर गेलेले तिघेजण वाघ दिसताच जिकडे बनेल तिकडे धावत-पळत सुटले.पण जीव वाचवण्यासाठी बंधाऱ्यावरून धावत असतांनाच सात वर्षीय चिमुकला बंधाऱ्यातील पाण्यात पडल्याने त्याला वाचविण्यासाठी उडी घेतलेल्या बापाचा व तत्पूर्वीच लेकाचा पाण्यात बुडून दुर्दैवी मृत्यू झाल्याची घटना रामटेक तालुक्याच्या देवलापार पोलीस ठाण्याच्या हद्दीतील छवारी गावच्या शिवारात घडली.जीवन धर्मदास कोकोडे वय ३६ वर्षे व जतिन जीवन कोकोडे वय ७ वर्षे,रा.छवारी,ता.रामटेक,जि.नागपूर असे मृतक बाप-लेकाचे नाव आहे.

• अशी घडली घटना👇

काल रविवारी जीवन कोकोडे,मुलगा जतिन व जीवन कोकोडे यांचा सालई गावातील २८ वर्षीय साळा संजय उईके हे तिघेही छवारी गाव शिवारातील लखन बंधाऱ्याजवळील शेतावर गेले होते.तिघेही शेतात काम करत असतांना साळा संजय उईके याला काही अंतरावर पट्टेदार वाघ दिसला.वाघ दिसताच संजयची भंबेरी उडाली.दरम्यान,त्याने वाघ म्हणून ओरड करताच तिघेही जिवाच्या आकांताने वेगवेगळ्या दिशेने धावत पळत सुटले.साळा बंधाऱ्याच्या खालच्या बाजूने पळाला,तर बापलेक बंधाऱ्याच्या वरच्या दिशेने धावू लागले.धावत असतांनाच अचानक चिमुकल्याचा पाय घसरला आणि तो बंधाऱ्याच्या खोल पाण्यात पडला.मुलाला वाचवण्यासाठी जीवन कोकोडे यांनी पटकन पाण्यात उडी घेतली.मुलाला वाचवण्याच्या धावपळीत आणि खोल पाण्याचा अंदाज न आल्याने दोघेही बंधाऱ्याच्या खोल पाण्यात बुडाले.यातच त्यांचा दुर्दैवी मृत्यू झाला. घटनेची माहिती मिळताच देवलापार पोलीस ठाण्याचे पोलिस निरीक्षक नारायण तुरकुंडे आणि वनपरिक्षेत्र अधिकारी शेषराव टुले यांनी पथकासह घटनास्थळी धाव घेत बचाव व पंचनामा प्रक्रिया पूर्ण केली.घटनेचे गांभीर्य आणि वाघाच्या पायांचे ठसे लक्षात घेता वनविभागाने मृतकांच्या वारसांना प्रत्येकी २५ लाख रुपयांची नुकसानभरपाई जाहीर केली असून तातडीची मदत म्हणून ५० हजार रुपये सुपूर्द केले.