भाजप नेत्याच्या मुलाचा मृतदेह आढळला तलावात; परिसरात तणावपूर्ण वातावरण..

नागपूर :-खापरखेडा-नांदा मार्गावरील तलावात भाजप नेते रमेश लोढे यांच्या मुलाचा मृतदेह आढळून आल्याने परिसरात खळबळ उडाली आहे.सचिन रमेश लोढे वय ३७ वर्षे,रा.वॉर्ड क्र.३,खापरखेडा,जि.नागपूर असे मृताचे नाव असून,त्याच्या मृत्यूमागील कारण अद्याप अस्पष्ट आहे.घटनास्थळावरील परिस्थिती पाहता पोलिसांनी हत्या आणि आत्महत्येच्या दोन्ही शक्यतांवर तपास सुरू केला आहे.

शनिवारी सकाळी स्थानिक नागरिकांना तलावात एक मृतदेह तरंगताना दिसला.याची माहिती मिळताच कोराडी पोलिसांनी स्थानिक मासेमारांच्या मदतीने मृतदेह बाहेर काढला.प्राथमिक अंदाजानुसार मृतदेह काही दिवसांपासून पाण्यात असल्याची शक्यता व्यक्त करण्यात येत आहे.घटनास्थळाचा पंचनामा करतांना तलावाच्या काठावर एमएच-४०-डी-६२३१ क्रमांकाची दुचाकी बेवारस अवस्थेत आढळली.या वाहनाच्या आधारे पोलिसांनी मृताची ओळख पटविली.मात्र, सचिन तलावाजवळ कसा पोहोचला,याबाबत अद्याप स्पष्ट माहिती समोर आलेली नाही.विशेष म्हणजे,सचिन लोढे यांनी दोन दिवसांपूर्वी कुटुंबीयांना शिर्डीला दर्शनासाठी जात असल्याचे सांगून घर सोडले होते.शिर्डीला जाण्याऐवजी ते कोराडी परिसरात कसे पोहोचले,याचा तपास पोलिस करीत आहेत.शवविच्छेदन अहवाल मिळाल्यानंतरच सदरचे प्रकरण हत्येचे की आत्महत्येचे,हे स्पष्ट होईल.कोराडी पोलीस या प्रकरणाचा अत्यंत गांभीर्याने तपास करत आहेत.घटनेने परिसरात तणावपूर्ण वातावरण आहे.