ब्रम्हपुरी तालुक्यातील इयत्ता दहावीचा विद्यार्थी रहस्यमयरित्या बेपत्ता..!

ब्रम्हपुरी(चंद्रपूर):-गेल्या तीन ते चार दिवसांपासून इयत्ता दहाव्या वर्गात शिकणारा १५ वर्षीय अल्पवयीन मुलगा रहस्यमयरित्या बेपत्ता झाल्याने आईवडील चिंताग्रस्त झाले आहेत.संतोष अरविंद सहारे,रा.तळोधी खुर्द,ता.ब्रम्हपुरी,जि.चंद्रपूर असे बेपत्ता असलेल्या विद्यार्थ्याचे नाव असून तो गांगलवाडीच्या लोक विद्यालय तथा उच्च माध्यमिक विद्यालयात इयत्ता दहाव्या वर्गात शिक्षण घेत आहे.संतोष हा मंगळवारी शाळेत गेला नसल्याने आईने समज देऊन त्याला शाळेत जाण्यासाठी सांगितले होते.परत दुसऱ्या दिवशी बुधवारी १७ सप्टेंबरला मुलगा नेहमीप्रमाणे शाळेत जाणार म्हणून त्याला काहीही न बोलता आईवडील कामासाठी बाहेर पडले.सायंकाळी कामावरून परत आल्यानंतर संतोष घरी नसल्याने गावात वास्तव्यास असणारी आजी, शाळेतील मित्र तसेच इतर नातेवाइकांकडे चौकशी करून शोधाशोध केली.शोधाशोध करूनही संतोषचा कुठेही थांगपत्ता लागलेला नसल्याने अखेर कुटुंबीयांनी पोलीस ठाण्यात धाव घेत तक्रार नोंदवली.त्यानुसार ब्रम्हपुरी पोलिसांकडून संतोषचा शोध सुरू आहे.