बापरे..! फेरफार नोंदीसाठी तलाठ्याने मागितले १ लाख २५ हजार.. – तलाठी एसीबीच्या जाळ्यात..

पुणे :-वडिलांच्या निधनानंतर वडिलोपार्जित जमिनीच्या फेरफार नोंदीमध्ये नाव नोंदवण्यासाठी चक्क १ लाख २५ हजाराची लाच मागून १ लाख रुपये स्विकारले व उर्वरित रकमेसाठी तगादा लावला असता पुणे लाचलुचपत प्रतिबंधक विभागाने तलाठ्यास रंगेहाथ अटक केल्याची घटना आज, मंगळवार १९ मे रोजी पुणे जिल्ह्याच्या मुळशी तालुक्यातील माण गावच्या साज्यात घडली. संतोष प्रल्हाद राणे वय ४५ वर्षे असे लाचखोर तलाठ्याचे नाव आहे.

प्रकरणातील ३५ वर्षीय तक्रारदार यांनी वडिलांच्या निधनानंतर वडिलोपार्जित जमिनीच्या फेरफार नोंदीमध्ये स्वतःचे आणि भावाचे नाव नोंदवण्यासाठी तलाठ्याकडे अर्ज केला होता.या कामासाठी तलाठी राणे यांनी सुरुवातीला १ लाख २५ हजार रुपयांची लाच मागितली होती.त्यापैकी,१ लाख रुपये यापूर्वीच स्वीकारल्याचे तपासात निष्पन्न झाले.उर्वरित २५ हजार रुपयांसाठी तक्रारदाराकडे सतत मागण केली जात होती.याबाबत तक्रारदाराने ११ मे २०२६ रोजी पुणेच्या लाच लुचपत प्रतिबंधक विभागाकडे तक्रार दाखल केली होती.यानंतर, १४ मे २०२६ रोजी लाच मागणी पडताळणी कारवाई करण्यात आली.या पडताळणीदरम्यान तलाठी संतोष राणे यांनी एकूण १ लाख २५ हजार रुपयांची मागणी केल्याचे आणि त्यातील १ लाख रुपये स्वीकारल्याचे मान्य केल्याचे समोर आले.तसेच,उर्वरित २५ हजार रुपयांची लाच मागितल्याचेही स्पष्ट झाले.त्यानुसार,आज मंगळवार १९ मे रोजी सायंकाळी सहा वाजेच्या दरम्यान एसीबीने माण येथील तलाठी कार्यालयात सापळा रचला. या वेळी आरोपी संतोष राणे याने २५ हजार रुपयांची लाच स्वीकारताच त्यांना रंगेहात पकडण्यात आले. प्रकरणी आरोपीविरुद्ध हिंजवडी पोलीस स्टेशन पिंपरी-चिंचवड पोलीस आयुक्तालय येथे भ्रष्टाचार प्रतिबंधक कायदा १९८८ अंतर्गत गुन्हा नोंद करण्याची प्रक्रिया सुरू करण्यात आली आहे.सदरची कारवाई पोलीस निरीक्षक प्रविण निंबाळकर यांच्या मार्गदर्शनाखाली करण्यात आली असून प्रकरणाचा पुढील तपास सहाय्यक पोलीस आयुक्त भारती मोरे करीत आहेत.