पोलीस हवालदाराची तलावात उडी घेऊन आत्महत्या..

नागपूर :-एका ४५ वर्षीय पोलीस हवालदाराने नागपूरच्या अंबाझरी तलावात उडी घेऊन आत्महत्या केल्याची धक्कादायक घटना उघडकीस आली आहे. शिलरत्न भीमराव बेलेकर वय ४५ वर्षे,रा.वाघदरी इसासनी असे आत्महत्या केलेल्या पोलीस हवालदाराचे नाव असून अलीकडेच काही महिन्यांपूर्वी हिंगणा पोलीस ठाण्यातून त्यांची बदली होऊन प्रतापनगर पोलीस ठाण्यात झाली होती.प्राथमिक तपासात कौटुंबिक वादातून त्यांनी टोकाचे पाऊल उचलल्याचे समोर आले आहे.

शिलरत्न यांचा पत्नीशी गेल्या दोन वर्षांपासून कौटुंबिक वाद सुरू होता.त्यामुळे ते दोन्ही मुलांसह इसासनी भागातल्या वडिलोपार्जित घरी रहात होते.त्यांचा एक मुलगा आठवीत तर दुसरी मुलगी चौथीच्या वर्गात शिकते.गेल्या काही दिवसांपासून पत्नी मुलांचा ताबा मागत असल्याने शिलरत्न नैराश्यात गेले होते.१९ फेब्रुवारीपासून ते पोलीस ठाण्यात गैरहजर होते.दरम्यान घरीही नसल्याने त्यांच्या भावाने तीन दिवसांपूर्वी शिलरत्न बेपत्ता झाल्याची तक्रार प्रतापनगर पोलिस ठाण्यात दिली होती.दरम्यान,काल सकाळी अंबाझरी तलावात पोहत असलेल्या काही तरुणांना एक मृतदेह दिसला.त्यांनी त्याची माहिती पोलिसांना दिली.पोलिसांनी घटनास्थळ गाठत मृतदेह तलावाबाहेर काढून तपासणी केली असता त्यात शिलरत्नचे ओळखपत्र सापडले. अंबाझरी पोलिसांनी मृतदेह शवविच्छेदनासाठी मेडिकलला पाठवला.घटनेने कुटुंबियांवर मोठा आघात झाला असून प्रकरणाचा पुढील तपास अंबाझरी पोलीस प्रशासन करीत आहे.