नक्षलवाद्यांचा घातपाताचा कट; प्रेशर बॉम्बचा एकामागून एक स्फोट.. -११ जवान गंभीर जखमी..

उद्रेक न्युज वृत्त :-काही काळासाठी अंडर ग्राउंड झालेल्या नक्षलवाद्यांनी पुन्हा डोके वर काढल्याचे

चित्र छत्तीसगडच्या बिजापूर जिल्ह्यात उघडकीस आले आहे.नक्षलवाद्यांनी घातपातासाठी जंगल परिसरात पेरून ठेवलेल्या प्रेशर बॉम्बचा एकामागून एक स्फोट झाल्याने नक्षलविरोधी कारवाईवर असलेले ११ जवान गंभीर जखमी झाल्याची घटना काल रविवारी बिजापूर जिल्ह्याच्या करेगट्टा टेकड्यांवरील घनदाट जंगल परिसरात घडली असून याबाबत आज,सोमवार २६ जानेवारी रोजी माहिती जाहीर करण्यात आली आहे. प्रजासत्ताक दिनाच्या पार्श्वभूमीवर सुरक्षा दलाचे जवान करेगट्टा टेकड्यांवरील घनदाट जंगल परिसरात नक्षलविरोधी अभियान राबवित असतांना जमिनीखाली असलेले प्रेशर बॉम्ब एकामागून एक स्फोट होत राहिले. ज्यामुळे सैनिक गंभीर जखमी झाले.जखमी सैनिकांपैकी १० जण राज्य पोलिसांच्या जिल्हा राखीव रक्षक(DRG) पथकाचे आहेत,तर एकजण केंद्रीय राखीव पोलिस दलाच्या(CRPF)कोब्रा बटालियनमधील आहे.रुद्रेश सिंह असे कोब्रा बटालियनच्या जखमी सैनिकाचे नाव असून ते कोब्राच्या २१० व्या बटालियनमध्ये उपनिरिक्षक म्हणून तैनात होते.पोलिस अधिकाऱ्यांनी माहिती देतांना सांगितले की,उपनिरीक्षक रुद्रेश सिंह आणि दोन डीआरजी सैनिकांच्या पायांना दुखापत झाली आहे.इतर तीन सैनिकांच्या डोळ्यात बारुद गेला,तर इतर सैनिकांनाही दुखापत झाली आहे.सर्व जखमींना पुढील उपचारासाठी रायपूर येथील रुग्णालयात दाखल करण्यात आले असून सद्या काहींची प्रकृती स्थिर असल्याचे वृत्त आहे.