चित्तथरारक घटना.! शौच करून परतणाऱ्या चार वर्षीय चिमुकलीवर बिबट्याचा हल्ला..

गोंदिया :-विदर्भातील वर्धा सोडले तर नागपूर,भंडारा, चंद्रपूर,गडचिरोली आणि गोंदिया जिल्ह्यात मोठ्या संख्येने मानव-वन्यजीव संघर्ष पहावयास मिळते.वन्य प्राण्यांकडून कधी वाहनांवर झडप तर कधी शेतकऱ्यांना ठार केले जात आहे.अश्यातच गोंदिया जिल्ह्याच्या अर्जुनी मोरगाव तालुक्यातील गोठणगाव येथे एक चित्तथरारक घटना नुकतीच उघडकीस आली आहे.बिबट्याने संधी साधत एका चार वर्षीय चिमुकलीवर हल्ला चढवून मानेला पकडत तिला फरफटत नेले.त्यातच चिमुकलीचा रडण्याचा आवाज ऐकून कुटूंबीय व शेजारील नागरिक धावून आल्याने मोठा अनर्थ टळला.पण,बिबट्याने चिमुकलीची मान पकडून फरफटत नेल्याने तिच्या मानेला दुखापत होऊन,यात गोठणगाव येथील चार वर्षीय युक्ता मारोती निखारे ही चिमुकली जखमी झाली.सदरची घटना दोन दिवसांपूर्वी शुक्रवारी रात्री नऊच्या दरम्यान घडली. घटनेने संपूर्ण परिसरात दहशतीचे वातावरण पसरले होते.

अधिक माहिती अशी की,घटनेच्या दिवशी चार वर्षीय युक्ताला शौच लागल्याने ती घरामागील शौचालयात गेली होती.अशातच युक्ता शौच करून घरी परत जात असतांना बिबट्याने अचानकपणे तिच्यावर हल्ला चढवला व जबड्यात मान पकडुन काही अंतरावर फरफटत नेले.त्यातच युक्ताचा रडण्याचा आवाज ऐकू येताच कुटुंबीयांना बिबट्या दिसला.त्यामुळे त्यांनी आरडाओरड केली.कुटुंबीयांचा ओरडण्याचा आवाज येताच शेजारीलही नागरिकांनी धाव घेत सर्वांनी मोठमोठ्याने आवाज केला.त्यामुळे बिबट्याने युक्ताला सोडून देत जंगलाच्या दिशेने धूम ठोकली.मात्र, बिबट्याने युक्ताची मान पकडून फरफटत नेल्याने तिच्या मानेला दुखापत झाली.यानंतर कुटुंबीयांनी लगेच जखमी युक्ताला गोठणगाव प्राथमिक आरोग्य केंद्रात उपचारासाठी दाखल केले.घटनेची माहिती वनविभागास कळताच त्यांनी घटनास्थळ गाठून पंचनामा केला.घटनेने नागरिक भयभीत झाले असून येत्या काळात एखादी अनुचित घटना घडू नये, याकरीता वनविभागाने वन्य प्राण्यांचा तात्काळ बंदोबस्त करावा,अशी मागणी नागरिकांकडून केली जात आहे.