केवळ मतांसाठी लाडकी बहीण योजना सुरू केली.. – योजनेचा पैसा कुणाच्या बापाचा नाही; सर्वसामान्य नागरिक जे टॅक्स भरतात त्यांचा हा पैसा आहे.. – समाचार घेतांना प्रहार जनशक्ती पक्षाचे आमदार बच्चू कडू यांचा जोरदार प्रहार..

गोंदिया :-भाजपचे खासदार धनंजय महाडिक यांनी लाडकी बहीण योजनेच्या लाभार्थी या काँग्रेसच्या सभेमध्ये दिसत असतील तर त्यांचे फोटो काढा आणि आम्हाला सांगा,आम्ही त्यांचा करेक्ट कार्यक्रम करू, असे वादग्रस्त वक्तव्य केले होते.त्याचा समाचार घेतांना प्रहार जनशक्ती पक्षाचे आमदार बच्चू कडू यांनी जोरदार प्रहार करीत,लाडकी बहीण योजनेचा पैसा कुणाच्या बापाचा नाही,तो सर्वसामान्य नागरिक जे टॅक्स भरतात त्यांचा हा पैसा आहे.त्यामुळे कुणीही याचा आव आणू नये; असे सांगत महाडिक यांच्यावर टीका केली.

प्रहार जनशक्ती पक्षाचे अर्जुनी मोरगाव विधानसभा मतदारसंघाचे उमेदवार डॉ.सुगत चंद्रिकापुरे यांच्या निवडणूक प्रचारार्थ सडक अर्जुनी येथे काल,रविवारी १० नोव्हेंबर ला आयोजित जाहीर सभेत ते बोलत होते.आमदार बच्चू कडू म्हणाले की,आम्ही दुधाला भाव मागितला,आम्ही धान पिकाला भाव मागितला होता.पण,ते सरकारला जमलं नाही.केवळ मतांसाठी लाडकी बहीण योजना सुरू केली.त्यामुळे सरकारचा हा डाव लाडक्या बहिणींनासुद्धा कळला असून,त्या नक्कीच तुम्हाला धडा शिकविल्याशिवाय राहणार नाहीत; असा इशारासुद्धा यावेळी दिला.अर्जुनी मतदारसंघाचा सर्वांगीण विकास करण्यासाठी आणि या क्षेत्राला विकासाची नवी गती देण्यासाठी युवा नेतृत्व डॉ.सुगत चंद्रिकापुरे यांच्या पाठीशी उभे राहण्याचे आवाहन त्यांनी केले.यावेळी अर्जुनी मोरगाव विधानसभा मतदारसंघाचे आमदार मनोहर चंद्रिकापुरे,उमेदवार डॉ.सुगत चंद्रिकापुरे,प्रहारचे जिल्हाध्यक्ष महेंद्र भांडारकर व पदाधिकारी उपस्थित होते.