किती बदमाश म्हणावे चोरटे; चक्क देवाचे दोन डोळेही नेले चोरून..!

चंद्रपूर :-चोरी करणारे चोरटे कधी,काय चोरी करतील याचा काही नेम नाही.चोरांनी एखादी योजना आखली तर ती फत्ते केल्याशिवाय राहत नाही.मात्र,ज्या ईश्वराची श्रद्धा मनात बाळगून भक्ती भावाने पूजा- अर्चना केली जाते,अश्या ईश्र्वरावरच डल्ला मारल्या जात असेल तर त्यांच्या सारखे महामूर्ख चोरटे कुणीच नाही.असे म्हणण्याची आता वेळ आली आहे.अज्ञात चोरट्यांनी एखाद्याच्या घरावर वा बँकेत चोरी केली नाही,तर चक्क देवाच्या मंदिरातून देवाचेच चांदीचे दोन डोळे चोरले असल्याची घटना चंद्रपूर जिल्ह्याच्या पोंभुर्णा तालुक्यातील देवाडा खुर्द येथील ग्रामपंचायत परिसरात असलेल्या पुरातन जागृत हनुमान मंदिरात घडली आहे.अज्ञात चोरटे इतक्यावरच थांबले नाहीत तर त्यांनी हनुमानाच्या मुर्तीच्या छातीवरील शेंदूरही काढून नेल्याची धक्कादायक बाब उघडकीस आली आहे.चोरी करण्यामागे अघोरी कृत्य करणाऱ्यांचा सहभाग असावा,अश्या चर्चांना परिसरात उधाण आले आहे.प्रकरणी गावकऱ्यांनी अज्ञात चोरट्यांचा शोध घेण्याचा प्रयत्न केला,परंतु घटनेस आठ दिवस लोटूनही अजूनपर्यंत चोरट्यांचा थांगपत्ताच लागेनासा झाल्याने गावात नाना तऱ्हेचे तर्क-वितर्क लावण्यात येत आहेत.आजच्या कलयुगातील चोरटे किती बदमाश झालेत,हे सदरच्या प्रकारावरून स्पष्टपणे दिसून येत आहे.पैश्याच्या लालचेने काहीजण देवालाही सोडत नाहीत तर तुम्हा आमची काय पर्वा? ही कल्पनाच न केलेली बरी.