अवैध पॅथॉलॉजी लॅब्समुळे रुग्णांच्या आरोग्याशी खेळ; जनहित याचिका दाखल

नागपूर :-राज्यात गेल्या अनेक वर्षांपासून कुठल्याही प्रकारची परवानगी न घेता अवैधरीत्या पॅथॉलॉजी लॅब्स सर्वत्र सुरू आहेत.सुरू असलेल्या या अवैध पॅथॉलॉजी लॅब्समुळे रुग्णांच्या आरोग्याशी खेळ केला जात असल्याचा गंभीर आरोप यवतमाळ येथील दिगंबर पचगडे यांनी केला आहे.त्यानुसार,पचगडे यांनी मुंबई उच्च न्यायालयाच्या नागपूर खंडपीठात याबाबत जनहित याचिका दाखल केली आहे.चुकीचे किंवा बोगस अहवाल देणाऱ्या या लॅब्सवर कारवाई न झाल्यास शेकडो रुग्णांच्या जीवितास धोका निर्माण होऊ शकतो,असे याचिकेतून स्पष्ट करण्यात आले आहे.सदरची याचिका स्वीकृत करीत न्यायमूर्ती अनिल किलोर आणि न्यायमूर्ती रजनीश व्यास यांनी राज्याचे प्रधान सचिव तसेच इतर सर्व संबंधित अधिकाऱ्यांना नोटीस बजावली आहे व येत्या ७ जानेवारी २०२६ पर्यंत यावर सविस्तर अहवाल सादर करण्याचे आदेश दिले आहेत.याचिकेनुसार, यवतमाळसह राज्यभरातील अनेक अवैध प्रयोगशाळांची माहिती प्रशासनाला वेळोवेळी देण्यात आली; मात्र, कोणत्याही स्तरावर कारवाई न झाल्याने न्यायालयीन हस्तक्षेपाची गरज भासली.या याचिकेत प्रतिवादी म्हणून प्रधान सचिव,वैद्यकीय शिक्षण व औषध विभागाचे सचिव,आरोग्य विभागाचे प्रमुख सचिव,यवतमाळ जिल्हाधिकारी,पोलिस अधीक्षक आणि शल्यचिकित्सकांचा समावेश असून न्यायालयीन दणक्याने अनेकांची धांदल उडाली आहे.