अपघातातील एसपी कार्यालयाच्या वरिष्ठ लिपिकाचा उपचारादरम्यान मृत्यू..

गडचिरोली :-जिल्ह्याच्या एसपी(पोलीस अधीक्षक) कार्यालयात कार्यरत वरिष्ठ लिपिकाचा आज, मंगळवारी २९ एप्रिलला सकाळच्या सुमारास झालेल्या अपघातात नागपूर येथे उपचारादरम्यान मृत्यू झाल्याने पोलीस प्रशासनात हळहळ व्यक्त केली जात आहे.विलास शंकर वासनिक वय ५७ वर्षे रा.मुरखळा,ता.गडचिरोली असे मृत पावलेल्या वरिष्ठ लीपिकाचे नाव आहे.

माहितीनुसार,विलास वासनिक हे आज मंगळवारी सकाळच्या सुमारास घरून गडचिरोली शहराच्या जिल्हा व सत्र न्यायालय परिसर चौकातून दुचाकीने एसपी कार्यालयात कर्तव्य बजावण्याकरीता जात होते.अशातच त्यांच्या दुचाकीला हायवा ट्रक क्रमांक- एमएच ३४ एम८९७० ने जोरदार धडक दिली.धडक इतकी भीषण होती की,ते जागीच कोसळले व मुका मार लागून डाव्या पायाला गंभीर दुखापत झाली होती.घटना घडताच बघ्यांनी मोठी गर्दी केली होती.नागरिकांनी तात्काळ गडचिरोली पोलिसांना कळविले असता त्यांनी तात्काळ विलास वासनिक यांना गडचिरोली जिल्हा सामान्य रुग्णालयात दाखल केले. मात्र,प्रकृती गंभीर असल्याने डॉक्टरांनी तात्काळ नागपूरला हलविण्यास सांगितले.त्यानुसार गडचिरोलीचे प्रभारी पोलीस अधीक्षक यतीश देशमुख यांनी पोलीस विभागाच्या हेलिकॉप्टरने नागपूर येथील ऑरेंज सिटी रूग्णालयात दाखल केले असता अखेर उपचारादरम्यान विलास वासनिक यांचा मृत्यू झाला.