पोलीस दलात खळबळ; बेपत्ता पोलीस कर्मचाऱ्याचा सापडला मृतदेह..!

पुणे :-जिल्ह्याच्या पिंपरी-चिंचवड शहराच्या पोलीस दलात खळबळ उडवणारी घटना आज,शनिवार २६ सप्टेंबर रोजी सकाळच्या सुमारास उघडकीस आली. तब्बल तीन दिवसांपासून बेपत्ता असलेल्या पोलीस कर्मचाऱ्याचा शोध मोहिमेत चक्क मृतदेह सापडल्याने परिसरात एकच खळबळ उडाली.विजय मोतीलाल कोळी वय ३६ वर्षे असे मृत पोलिस कर्मचाऱ्याचे नाव असून ते पिंपरी-चिंचवड पोलिस दलातील वरिष्ठ अधिकाऱ्यांकडे नियंत्रण कक्षात(आरटीपीसी)कार्यरत होते.विजय कोळी हे बुधवार २३ सप्टेंबर रोजी कौटुंबिक वादानंतर सकाळच्या सुमारास घरातून निघून गेले होते. त्यानंतर ते घरी परतलेच नाही.कुटुंबियांकडून त्यांचा शोध घेतला जात होता.पण,त्यांचा कुठेही थांगपत्ता लागत नसल्याने त्यांच्या पत्नी सारिका विजय कोळी यांनी बेपत्ता असल्याची तक्रार चिखली पोलिस ठाण्यात नोंदवली होती.विशेष म्हणजे,विजय कोळी हे घरून निघून गेले त्यावेळेस त्यांच्याकडे सर्विस रिव्हॉल्वर (सरकारी पिस्तूल)असल्याचे समोर आल्याने पोलिस यंत्रणेने त्यांचा शोध सुरू केला होता.त्यांचे शेवटचे लोकेशन पिंपरी-चिंचवड शहराच्या निगडीतील दुर्गादेवी टेकडी परिसरात आढळल्याने त्या भागात पोलिसांनी व्यापक शोधमोहीम राबवली.ड्रोनच्या सहाय्यानेही परिसर पिंजून काढण्यात आला होता.दरम्यान,आज शनिवारी सकाळच्या सुमारास निगडी ट्रान्सपोर्टनगर येथील बस डेपो परिसरात विजय कोळी यांचा मृतदेह आढळून आला.घटनास्थळी सर्विस रिव्हॉल्वरही मिळून आली.प्राथमिक तपासात त्यांनी सर्विस रिव्हॉल्वरमधून स्वतःवर गोळी झाडून आत्महत्या केल्याचे समोर आले आहे.घटनेची माहिती मिळताच पिंपरी-चिंचवड शहर पोलीस दलातील वरिष्ठ अधिकारी आणि फॉरेन्सिक पथक घटनास्थळी दाखल झाले.त्यानंतर,पुढील प्रक्रिया पार पाडून तपास सुरू केला आहे.घटनेने पिंपरी-चिंचवड पोलिस दलात हळहळ व्यक्त केली जात असून कोळी कुटुंबियांवर दुःखाचे डोंगर कोसळले आहे.