शेतात उभे असतांना जवळच कोसळली वीज; पतीचा मृत्यू,तर पत्नी थोडक्यात बचावली..

महादेव साखरकर हे पत्नी कलावतीसोबत शेतात मिरचीच्या पिकाची डवरण करण्यासाठी गेले होते.

शेतात काम करीत असतांना सायंकाळी साडे चार वाजताच्या सुमारास हलक्या पावसाला सुरुवात झाली. त्यामुळे महादेव व त्यांची पत्नी शेतातील झाडाखाली आडोशाला गेले.काही वेळाने पाऊस उघडताच महादेव यांनी पुन्हा कामाला सुरुवात केली.दरम्यान,काम करत असतांनाच आकाशात जोरात कडाडलेली वीज थेट त्यांच्या जवळ कोसळली.यात ते गंभीररीत्या होरपळल्याने महादेव यांचा घटनास्थळीच मृत्यू झाला,तर जोडीतील एक बैल किरकोळ जखमी झाला.त्यांच्या पत्नी व जोडीतील दुसरा बैल मात्र थोडक्यात बचावला. माहिती मिळताच महसूल व पोलिस विभागातील कर्मचाऱ्यांनी घटनास्थळ गाठून पाहणी व पंचनामा केला आणि त्यांचे पार्थिव उत्तरीय तपासणीसाठी उमरेड शहरातील ग्रामीण रुग्णालयात पाठवला.याप्रकरणी उमरेड पोलिसांनी अकस्मात मृत्यूची नोंद करून तपास सुरू केला आहे.