चुडाराम बल्हारपुरे यांच्या ‘गोंडवानाचा महायोध्दा: क्रांतिवीर बाबूराव शेडमाके’ नाटकातील नाट्यांश विद्यापीठाच्या अभ्यासक्रमात..

गडचिरोली :-विदर्भातील प्रसिध्द नाटककार तथा महाराष्ट्र शासन पुरस्कृत साहित्यिक चुडाराम बल्हारपुरे यांच्या मधुश्री प्रकाशन पुणे यांनी प्रकाशित केलेल्या व संपूर्ण महाराष्ट्रात गाजलेल्या ‘गोंडवानाचा महायोध्दा : क्रांतिवीर बाबूराव शेडमाके’ या नाटकातील नाट्यांश (अंक ३,प्रवेश ६)गडचिरोली येथील गोंडवाना विद्यापीठाच्या बी.ए.तृतीय वर्षाच्या गोंडवाना भाषावैभव-भाग ३,सत्र ५ च्या अभ्यासक्रमात नविन शिक्षण धोरण अंतर्गत समाविष्ट करण्यात आले आहे.त्यामुळे जिल्ह्यातील साहित्यिक,सांस्कृतिक व नाट्य क्षेत्रातील लौकिकाचे कौतुक करून आनंद व्यक्त करण्यात येत आहे.गोंडवानाच्या स्वातंत्र्यासाठी जीवाचे रान करुन वयाच्या २५ व्या वर्षी शहीद झालेल्या चांदागडच्या सुपुत्राची-आदिवासी गोंडराजाची शौर्यगाथा असलेल्या या नाटकाची विद्यापीठाने दखल घेतल्यामुळे गडचिरोली व चंद्रपूर जिल्ह्यातील विद्यार्थी या नाटकाचा अभ्यास करणार आहेत व गडचिरोली जिल्ह्यातील या आद्य क्रांतीकारकाच्या इतिहासाला नविन उजाळा मिळणार आहे,असे मत जाणकारांनी व्यक्त केले.

चुडाराम बल्हारपुरे यांचे ‘गोंडवानाचा महायोध्दा : क्रांतिवीर बाबूराव शेडमाके’ हे केवळ झाडीपट्टीतच नव्हे तर संपुर्ण महाराष्ट्रात गाजलेले नाटक असून शासन स्तरावरुन या नाटकाचे अनेक प्रयोग अनिरुध्द वनकर यांचे दिग्दर्शनाखाली सादर झालेले आहेत. तसेच राज्य परिवहन महामंडळ,गडचिरोली यांचेतर्फे देखील या नाटकाचे प्रयोग विभागीय स्तरावर नाट्यस्पर्धांमधून सादर करण्यात आले आहेत.विविध संस्थांचे राज्यस्तरीय १० पुरस्कार या नाटकास प्राप्त झालेले आहेत.चुडाराम बल्हारपुरे यांनी गोंडवाना विद्यापीठातील मराठी अभ्यास मंडळाचे आभार मानले आहे.