अंगावर भिंत कोसळून चिमुकलीचा दुर्दैवी मृत्यू..

गोंदिया :-जिल्ह्याच्या अर्जुनी मोरगाव तालुक्यातून आज,सोमवार २४ ऑगस्ट रोजी एक अत्यंत दुर्दैवी घटना समोर आली आहे.अर्जुनी मोरगाव तालुक्यातील खामखुरा गावात घरासमोरील अंगणात खेळत असलेल्या दोन वर्षाच्या चिमुकलीच्या अंगावर जीर्ण झालेल्या घराची भिंत कोसळल्याने घडलेल्या दुर्घटनेत भिंतीखालील मलब्यात दबून चिमुकलीचा जागीच मृत्यू झाला.प्रतीक्षा मुकेश राऊत वय २ वर्षे,रा.कोरंभी असे मृत पावलेल्या चिमुकलीचे नाव आहे.ही घटना आज सोमवारच्या दुपारी साडेबारा वाजेच्या सुमारास घडली.

प्रतीक्षाचे आई-वडील मोलमजुरी आणि शेतीची कामे करून आपला उदरनिर्वाह करतात.सध्या शेतीची कामे सुरु असल्याने आज सोमवारी प्रतीक्षाच्या आई-वडिलांना निंदण काढण्याच्या कामासाठी शेतावर जायचे असल्याने तिला खामखुरा येथील नातेवाईक केशव नेवारे यांच्या घरी आणून ठेवले होते.

दरम्यान,दुपारच्या सुमारास प्रतीक्षा नेहमीप्रमाणे घरासमोरील अंगणात खेळत होती.अंगणाला लागूनच विलास नेवारे यांचे एक जुने आणि पडके घर आहे. मागील काही दिवसांपासून परिसरात पाऊस सुरू असल्याने,घराची भिंत पूर्णपणे ओली आणि आतून कमकुवत झाली होती.चिमुकली खेळत असतांनाच अचानकपणे भिंत थेट तिच्या अंगावर कोसळली.माती आणि विटांच्या ढिगाऱ्याखाली प्रतीक्षा दबली गेली आणि यातच तिचा मृत्यू झाला.घटना घडताच  आजूबाजूच्या ग्रामस्थांनी तातडीने घटनास्थळी धाव घेतली.घटनेची माहिती मिळताच गावचे पोलीस पाटील जयप्रकाश लाडे यांनी तात्काळ अर्जुनी मोरगाव पोलिसांना पाचारण केले. पोलिसांनी घटनास्थळ गाठून मोका चौकशी करून पंचनामा केला व मृतदेह शवविच्छेदनासाठी रुग्णालयात पाठवला.घटनेने परिसरात हळहळ व्यक्त केली जात आहे.