आश्रमशाळेतील गैरप्रकार प्रकरणी आरोपी शिपायास पोलिस कोठडी..

नागपूर :-जिल्ह्याच्या काटोल तालुक्यातील कोंढाळी पोलिस ठाण्याच्या हद्दीतील पुसागोंदी येथील निवासी आश्रमशाळेत विद्यार्थ्यांसोबत कथित गैरवर्तन केल्याच्या गंभीर आरोपावरून आश्रमशाळेच्या नाइट वॉचमनला कोंढाळी पोलिसांनी अटक केली आहे.राजेश मुलचंद मालापुरे वय ४४ वर्षे,असे आरोपीचे नाव असून आरोपीविरोधात यापूर्वीही वर्धा जिल्ह्यातील आर्वी येथे लैंगिक शोषणाचा गुन्हा दाखल होता.प्रकरण उघडकीस येताच नागपूरचे जिल्हाधिकारी कुमार आशीर्वाद यांनी या प्रकरणाची गंभीर दखल घेत सखोल चौकशीचे निर्देश दिले.शिपायाविरुद्ध पोलिसांनी पोक्सो कायदा,बाल न्याय अधिनियम तसेच ॲट्रॉसिटी कायद्यांतर्गत गुन्हा दाखल केला आहे.दरम्यान,आरोपी राजेश मालापुरे यास नागपूर येथील न्यायालयात हजर केले असता,न्यायालयाने त्याला तीन दिवसांची पोलिस कोठडी सुनावली आहे.विशेष म्हणजे,प्रकरणातील घटनाक्रमाची माहिती मिळवणे, विद्यार्थी-विद्यार्थिनी व संबंधितांकडून प्राप्त झालेल्या तक्रारींची पडताळणी करणे,तसेच प्रकरणाबाबत अधिक माहिती जाणून घेण्यासाठी पोलिसांनी पोलिस कोठडीची मागणी केली होती.आरोपीविरुद्ध यापूर्वीही आणखी अश्याच स्वरूपाचे गुन्हे दाखल आहेत कां?याचीही पोलिसांकडून चौकशी सुरू करण्यात आली आहे.