वाघ अन् बिबट्याचा थरार; जखमी बिबट्याचा नागरिकांवर हल्ला.. – तिघे गंभीर जखमी,तर एकजण किरकोळ जखमी..

गडचिरोली :-वाघ आणि बिबट्याच्या झुंजीत निपचित पडलेल्या बिबट्याचा मृत्यू झाला असावा,अशी मनधारणा झालेल्या नागरिकांनी बिबट्याजवळ जाऊन पाहताच धाडकन उठून उभा झालेल्या बिबट्याने चार नागरिकांवर हल्ला चढवून तिघांना गंभीर केले.तर एकास किरकोळ दुखापत झाल्याची घटना आज,बुधवार २५ मार्च रोजी सकाळच्या सुमारास पोर्ला वनपरिक्षेत्रांतर्गत येणाऱ्या चांभार्डा-मरेगाव मार्गावर घडली.विलास दादाजी ठाकरे वय ४८ वर्षे,रेखा विठ्ठल मडावी वय ४५ वर्षे,दोघेही रा. चांभार्डा,ता.जि.गडचिरोली व लुमाजी मुनघाटे वय ४० वर्षे,रा.टेंबा,ता.जि.गडचिरोली हे गंभीर जखमी झाले असून स्थानिक प्राथमिक आरोग्य केंद्रात प्रथमोपचार करून त्यांना पुढील उपचारार्थ गडचिरोली जिल्हा सामान्य रुग्णालयात हलविण्यात आले आहे.तर चांभार्डा येथील ३७ वर्षीय लीलाधर मुनघाटे हे किरकोळ जखमी झाले असून त्यांची प्रकृती स्थिर आहे.

आज बुधवारच्या सकाळी आठ वाजेच्या सुमारास चांभार्डा-मरेगाव पांदण रस्त्यालगत हरिदास मुनघाटे यांच्या शेताजवळ एक बिबट जखमी अवस्थेत निपचित पडलेला दिसून आल्याने मार्गावरून जाणाऱ्या नागरिकांनी त्याच्या जवळ जाऊन पाहिले.मात्र,बिबट्याने त्यांच्यावरच हल्ला केला.यामुळे तिघेही गंभीर जखमी झाले.तर एकजण किरकोळ जखमी झाला.माहिती मिळताच वनपरिक्षेत्र अधिकारी आर.डी.पाचभाई आणि त्यांच्या पथकाने तातडीने घटनास्थळी धाव घेतली. त्यानंतर,पशुवैद्यकीय विभागाच्या चमूला पाचारण करण्यात आले.हल्ला चढवल्यानंतर कुठलीही हालचाल करत नसल्याने बिबट्याचा मृत्यू झाल्याचे स्पष्ट करण्यात आले.प्रसंगी बिबट्याच्या शरीर आणि मानेवर दुसऱ्या प्राण्याचे दात व नखे रुतल्याच्या खोल जखमा दिसून आल्या.प्राथमिक अंदाजानुसार,बिबट्याची दुसऱ्या एखाद्या वाघासोबत झुंज झाली असावी आणि त्यात लागलेल्या गंभीर जखमांमुळेच त्याचा मृत्यू झाला असावा,असा अंदाज अधिकाऱ्यांनी व्यक्त केला.

याप्रसंगी सहायक उपवनसंरक्षक आर.एस.सुर्यवंशी, पोर्लाचे वनपरिक्षेत्र अधिकारी आर.डी.पाचभाई,आरमोरी पोलीस ठाण्याचे ठाणेदार कैलास व्ही.गवते,पशुवैद्यकीय अधिकारी डॉ.मृणाल टोंगे व शीघ्र कृती दलाचे कर्मचारी उपस्थित होते.