मोठ्या भावाच्या रिसेप्शनच्या दिवशीच लहान भावाने संपवली जीवनयात्रा..

गोंदिया :-मोठा भाऊ आणि लहान भाऊ मिळून शेती करायचे.वय होत चालल्याने वडिलांनी दोघांसाठीही मुलींचा शोध घेतला होता.मोठ्या मुलाला मुलगी मिळाल्याने मोठ्या मुलाचे लग्न गुरुवार १९ मार्च रोजी केले.त्यानंतर,सोमवार २३ मार्च रोजी स्वागत समारोहचा कार्यक्रम ठरला असतांनाच लग्न जुळत नसल्याच्या नैराश्यातून लहान भावाने गावातील विहिरीत उडी घेऊन आत्महत्या केल्याची घटना गोंदिया जिल्ह्याच्या देवरी तालुक्यात उघडकीस आली आहे.हेमंत प्रकाश मडावी वय २४ वर्षे,रा.धमदीटोला/पळसगाव,ता.देवरी, जि.गोंदिया असे आत्महत्या केलेल्या तरुणाचे नाव असून तो आपल्या भावाचे लग्न झाले,मात्र आपले लग्न जुळत नसल्याने गेल्या दोन ते तीन दिवसांपासून मानसिक तणावाखाली होता.तो सतत अस्वस्थ असायचा आणि किरकोळ कारणावरून चिडचिड करायचा.यातच त्याने टोकाचे पाऊल उचलून जीवनयात्रा संपविली.मृतकाचे वडील प्रकाश मडावी यांनी दिलेल्या तक्रारीवरून पोलीस ठाण्यात आकस्मिक मृत्यूची नोंद करण्यात आली. कोणत्याही समस्येवर आत्महत्या हा उपाय नाही. मानसिक ताण जाणवत असल्यास आपल्या जवळच्या व्यक्तींशी संवाद साधा किंवा समुपदेशकाची मदत घ्या,असे चिचगड पोलीस ठाण्याचे पोलिस निरीक्षक जनार्दन हेगडकर यांनी स्पष्ट केले.