नवऱ्याने खून केल्याचा संशय अन् भांडाफोड झाला.. -तब्बल तीन दिवसांनी जंगलात आढळला होता विवाहित महिलेचा मृतदेह..

गडचिरोली :-जिल्ह्याच्या कोरची तालुक्यात तब्बल तीन दिवसांनी जंगलात एका महिलेचा मृतदेह आढळून आल्याने परिसरात एकच खळबळ उडाली होती.प्रकरणी दारुड्या नवऱ्यानेच मुलीचा खून केल्याचा संशय सासूने केला होता.सासूच्या तक्रारीवरून कोटगूल पोलिसांनी मृत महिलेच्या पतीस संशियत आरोपी म्हणून गुरुवार ४ सप्टेंबर रोजी अटक केली होती व काल शुक्रवारी संपूर्ण प्रकरणाचा उलगडा झाला.टामीनबाई पुरुषोत्तम कचलाम वय ३४ वर्षे,असे हत्या झालेल्या महिलेचे नाव असून पुरुषोत्तम गजराज कचलाम वय ३७ वर्षे,रा.सोनपूर, ता.कोरची,जि.गडचिरोली असे आरोपी पतीचे नाव आहे.

पुरुषोत्तम कचलाम यास दारूचे व्यसन जडले होते. दारूच्या नशेत पत्नी टामीनबाई हिच्याशी नेहमी वाद घालून चारित्र्यावर संशय घ्यायचा.पुरुषोत्तमच्या रोजच्या कटकटीपायी पत्नी तसेच नऊ व पाच वर्षांची दोन्ही चिमुकले त्रासले होते.त्यामुळे टामीनबाईने छत्तीसगडच्या मानपूर-मोहला जिल्ह्यातील चौकी गावी तिचे माहेर असल्याने आई चमरीबाई बोगा हिच्याकडे जाण्याचा निर्णय घेतला.त्यानुसार सोमवार १ सप्टेंबर २०२५ रोजी पती पुरुषोत्तम व टामीनबाई दोघेही सोनपूर येथून जंगल मार्गे पायी निघाले होते.जात असतांनाच वाटेत कामेली वनक्षेत्रात दोघांमध्ये वाद झाला.वाद होताच दारूच्या नशेत असलेल्या पुरुषोत्तमने पत्नीच्या छातीवर बसून तिचा गळा दाबला.गळा दाबताच तिचा घटनास्थळीच मृत्यू झाला.मृत्यू होताच आरोपी पुरुषोत्तम याने घटनेची कुठेही वाच्यता न करता घरी परतला. अश्यातच तब्बल तीन दिवसांनी जंगल परिसरात मृतदेह आढळून आल्याने परिसरात एकच खळबळ उडाली होती.त्यानुसार मृतदेहाची ओळख पटताच मृत टामीनबाई हिच्या आईला माहिती देण्यात आली.मृत महिलेची आई चमरीबाई बोगा हिने कोटगूल पोलीस ठाणे गाठून तक्रार दाखल केली होती.त्यानुसार पोलिसांनी संशयित आरोपी म्हणून मृत महिलेच्या पतीस अटक केली होती.अटक करताच आरोपीने उडवाउडवीची उत्तरे दिली.पोलिसी खाक्या मिळताच पुरुषोत्तमने गुन्हाची कबुली दिली.त्यानुसार आरोपी पुरुषोत्तम कचलाम याचेवर पत्नीच्या हत्ये प्रकरणी भारतीय न्याय संहिता कलम १०३(१) अन्वये गुन्हा दाखल करण्यात आला आहे.प्रकरणाचा पुढील तपास कोटगुल पोलीस ठाण्याचे प्रभारी ठाणेदार कृष्णा सोळुंके करीत आहेत.