शेतकऱ्यांसाठी आनंदाची बातमी; पिएम किसान योजनेच्या २ हजार रुपयांची प्रतीक्षा संपली..!

उद्रेक न्युज वृत्त :-प्रधानमंत्री किसान सन्मान निधी योजनेच्या २० व्या हप्त्याची आतुरतेने वाट बघणाऱ्या शेतकऱ्यांची अखेर प्रतीक्षा संपली असून प्रधानमंत्री किसान सन्मान निधी योजनेचा २० वा हप्ता येत्या,शनिवार २ ऑगस्ट २०२५ रोजी वितरित केला जाणार असल्याचे केंद्रीय कृषी तथा शेतकरी कल्याण मंत्री शिवराज सिंह चौहान यांनी म्हटले आहे.मंत्री शिवराज सिंह चौहान यांच्या अध्यक्षतेखाली आज,गुरुवार ३१ जुलै रोजी उच्चस्तरीय बैठक पार पडली.या बैठकीत २ ऑगस्ट रोजी उत्तर प्रदेशच्या वाराणसी येथे पंतप्रधान नरेंद्र मोदी यांच्या नेतृत्वाखाली आयोजित होणाऱ्या कार्यक्रमाच्या तयारीबाबत आणि अधिकाधिक शेतकऱ्यांपर्यंत लाभ पोहोचवण्यासाठी सविस्तर चर्चा झाली.बैठकीस देशभरातील ७३१ कृषी विज्ञान केंद्रे (केव्हीके), भारतीय कृषी संशोधन परिषद (आयसीएआर) आणि कृषी विद्यापीठांचे संचालक, कुलगुरू आणि प्रमुख दूरदृश्य प्रणालीद्वारे सहभागी झाले होते.पंतप्रधान नरेंद्र मोदी यांनी पीएम  किसान  योजनेचा मागील १९ वा हप्ता हा २४ फेब्रुवारी २०२५ रोजी बिहारमधील भागलपूर येथील एका कार्यक्रमातून जारी केला होता.त्यातच आता जून,जुलै महिना संपूनही दोन हजार जमा झाले नसल्याने शेतकरी संभ्रमात होते. त्यानुसार आता येत्या २ ऑगस्ट रोजी पीएम किसान योजनेचा २० वा हप्ता शेतकऱ्यांच्या खात्यात जमा होणार आहे.यात ९.७ कोटी शेतकऱ्यांना सुमारे २० हजार ५०० कोटी रुपये वितरित केले जाणार आहेत.