मुख्यमंत्री युवा कार्य प्रशिक्षणार्थींची विविध मागण्या घेऊन जिल्हा कचेरीवर धडक..

गडचिरोली :-राज्यातील युवकांना त्यांच्या शिक्षणानंतर प्रत्यक्ष कामाचे प्रशिक्षण देऊन नोकरी मिळण्याची त्यांची क्षमता वाढविण्यासाठी ‘मुख्यमंत्री युवा कार्य प्रशिक्षण योजना’ २०२४-२५ या आर्थिक वर्षापासून सुरू करण्यात आली.या माध्यमातून उद्योजक,खासगी क्षेत्रातील आस्थापना,सेवा क्षेत्र,केंद्र व राज्य शासनाच्या शासकीय, निमशासकीय आस्थापनांना मनुष्यबळ पुरवठा करण्यात आला आहे.त्यानुसार जिल्ह्यात ऑगस्ट २०२४ पासून २ हजार ३०० मुख्यमंत्री युवा कार्य प्रशिक्षणार्थी वेगवेगळ्या २७ आस्थापनांवर कार्यरत आहेत.त्यांची नियुक्ती सहा महिन्यांसाठी करण्यात आली होती.परंतु फेब्रुवारी २०२५ मध्ये हा कालावधीत संपुष्टात येणार असल्याने मुख्यमंत्री युवा कार्य प्रशिक्षणार्थींना कायमस्वरुपी रोजगार द्यावा,विद्यावेतनात वाढ करुन ते नियमित व वेळेवर देण्यात यावे; या मागण्यांसाठी आज,सोमवार २० जानेवारीला मुख्यमंत्री युवा कार्य प्रशिक्षणार्थी संघटनेने जिल्हाधिकारी कार्यालयावर मोर्चा काढला.मोर्चात जिल्हाभरातील हजारांहून अधिक प्रशिक्षणार्थी सहभागी झाले होते.मुख्यमंत्री युवा प्रशिक्षणार्थी संघटनेचे जिल्हाध्यक्ष दशरथ कोवे, उपाध्यक्ष चरण बन्सोड,सचिव पंकज नैताम आदींच्या नेतृत्वात हा मोर्चा काढण्यात आला.