अन् महिला सरपंचाच्या कामात पतीच करतो लुडबुड.. – शासनाच्या आदेशाला केराची टोपली..

गडचिरोली :-राज्यात अनेक ग्रामपंचायतींमध्ये आरक्षणामुळे महिला सरपंचपदावर आरूढ झाल्या, परंतु,बहुतांशी ग्रामपंचायतीत महिला सरपंचांच्या कारभारात पतींचा हस्तक्षेप वाढत चालला आहे. सरकारने हे रोखण्यासाठी कायद्याचा बडगा उगारला असला तरीही गडचिरोली जिल्ह्यातील अनेक गावातील ग्रामपंचायतींचा कारभार हा सरपंच महिलांचा पतीच चालवत असल्याचे चित्र आहे.

राज्यासह गडचिरोली जिल्ह्यातील बऱ्याच गावात ‘महिला’ सरपंच आहेत; मात्र,बहुतांश ठिकाणी महिला सरपंचांच्या कामात त्यांचे पती सर्वत्र सर्रासपणे लुडबुड करतांना दिसतात.गडचीरोली जिल्हाच नव्हे तर राज्यातही हा प्रकार पुढे आला होता.त्यामुळे राज्य शासनाने एक आदेश काढून महिला सरपंचांच्या कामात पती अथवा इतर नातेवाइकांचा हस्तक्षेप चालणार नाही; असे स्पष्ट केले हाते.परंतु,तरीही आजही अनेक गावात महिला सरपंचांच्या अधिकारावर गदा आणून पतीदेवाचा राजरोसपणे हस्तक्षेप सुरू असल्याचे अनेक ग्रामपंचायतीत दिसत आहे.परिणामी ‘महिला सरपंच नावाला आणि पतीदेव गावाच्या कारभाराला’ अशी परिस्थिती सध्या पहायला मिळत आहे.अनेक ग्रामपंचायतीत महिला सरपंचांचे पती हे कर्मचाऱ्यांना दमदाटी करणे,बारीक-बारीक चुका काढून टोमणे मारणे,या त्रासाला कंटाळून कामगार कामाला जाण्यासाठी टाळाटाळ करू लागले आहेत.विशेष म्हणजे,ग्रामसेवकांनी तसेच सरपंचांनी  पतीदेवाला समज देणे गरजेचे आहे; परंतु, तसे होतांना दिसत नाही.कर्मचाऱ्यांना उद्धट वागणूक देत असतांना ग्रामसेवक यांच्याकडून कोणताही विरोध करण्यात येत नाही; त्यामुळे यात दोषी असतील त्यांच्यावर कारवाईची मागणी जनसामान्यांतुन होऊ लागली आहे.त्यामुळे याकडे पंचायत समितीचे संवर्ग गटविकास अधिकारी लक्ष देतील का? असा सवाल नाव न छापण्याच्या अटीवर काही नागरिकांनी केला.