उद्रेक न्युज वृत्त
गडचिरोली :-खरीप पणन हंगाम २०२३-२४ मधील धान खरेदीसाठी नोंदणीकृत शेतकऱ्यांना प्रोत्साहनपर राशीची रक्कम अदा करण्याबाबत शासनाने २६ मार्चला परिपत्रक काढले आहे.त्यानुसार नोंदणीकृत शेतकऱ्यांनी महामंडळाला धान विक्री केली असो वा नसो धान उत्पादनाकरिता त्यांच्या धान लागवडीखालील जमीन धोरणानुसार प्रतिहेक्टरी रुपये २० हजार प्रमाणे दोन हेक्टरच्या मर्यादेत राहून प्रोत्साहन राशी बोनस अदा करण्यास शासनाने मान्यता दिली आहे.
३१ मार्च पर्यंत सर्व शेतकऱ्यांना त्यांच्या खात्यात थेट रक्कम जमा करण्याचे निर्देश देण्यात आले आहेत.दि महाराष्ट्र स्टेट को-ऑपरेटिव्ह मार्केटिंग फेडरेशन मुंबई यांच्या आदेशानुसार गडचिरोली जिल्ह्यातील धान उत्पादक शेतकऱ्यांना ८५ कोटी ३५ लाख ४७ हजार ७८० रुपये एवढी बोनसची रक्कम खात्यात जमा होणार असल्याने शेतकऱ्यांना दिलासा मिळणार आहे.राज्यातील धान उत्पादक दहा जिल्ह्यांना हा लाभ मिळणार आहे.त्यामध्ये गडचिरोली जिल्ह्याचाही समावेश आहे.सदर योजनेचा लाभ घेण्याकरिता शेतकऱ्यांनी ई-पीक वर ऑनलाइन नोंदणी करणे आवश्यक आहे.तसेच आदिवासी खरेदी संस्था किंवा महाराष्ट्र स्टेट को-ऑपरेटीव्ह मार्केटिंग फेडरेशन यांच्यामार्फत चालवण्या जाणाऱ्या खरेदी संस्थांकडे नोंदणी करणे आवश्यक आहे.
