वैयक्तिक तक्रारी थेट जिल्हास्तरावर मांडण्याची संधी..!

गडचिरोली :-जिल्हास्तरावरील लोकशाही दिनाचे आयोजन येत्या,बुधवार ४ मार्च रोजी दुपारी ३ वाजता जिल्हाधिकारी कार्यालय येथील सभागृहात करण्यात येणार आहे.लोकशाही दिन हा नागरिकांना त्यांच्या वैयक्तिक तक्रारी थेट जिल्हास्तरावर मांडण्याची संधी उपलब्ध करून देणारा महत्त्वपूर्ण उपक्रम आहे.प्रशासन आणि नागरिक यांच्यातील संवाद अधिक परिणामकारक व्हावा तसेच प्रलंबित तक्रारींवर त्वरित कार्यवाही व्हावी,या उद्देशाने दर महिन्याला लोकशाही दिनाचे आयोजन करण्यात येते.

ज्या तक्रारदारांना जिल्हास्तरावरील लोकशाही दिनात तक्रार अर्ज दाखल करावयाचा आहे,त्यांनी संबंधित तक्रार प्रथम तालुका स्तरावरील लोकशाही दिनात मांडलेली असणे आवश्यक आहे.तालुका स्तरावर तक्रारीचे निराकरण होऊन प्राप्त झालेल्या अहवालावर समाधान न झाल्यासच संबंधित तक्रारदारास जिल्हास्तरावर अर्ज सादर करता येईल. अर्जासोबत तहसिलदारांच्या उत्तराची प्रत तसेच तालुका लोकशाही दिनाच्या टोकन क्रमांकाची प्रत जोडणे आवश्यक आहे.

सदर अर्ज विहित नमुना प्रपत्र १ (ब) मध्ये भरून अर्जाची आगाऊ प्रत जोडून सादर करावे.तसेच तक्रार किंवा निवेदन हे वैयक्तिक स्वरूपाचे असणे आवश्यक असून अन्य प्रकारचे अर्ज विचारात घेतले जाणार नाहीत.

जिल्हा प्रशासनाने नागरिकांना शासनाने निर्धारित केलेल्या सूचनांचे पालन करून आवश्यक कागदपत्रांसह अर्ज वेळेत सादर करण्याचे आवाहन केले आहे, जेणेकरून लोकशाही दिनाच्या माध्यमातून त्यांच्या तक्रारींवर तातडीने व प्रभावी कार्यवाही करता येईल.