विद्यार्थ्यांनो अभ्यासाला लागा; दहावी-बारावी बोर्ड परीक्षांच्या तारखा जाहीर..

उद्रेक न्युज वृत्त :-दहावी आणि बारावीतील विद्यार्थ्यांच्या मनावरील अभ्यासाचे ताण कमी व्हावे, याचबरोबर विद्यार्थ्यांना अभ्यासक्रमाचे योग्य नियोजन करता यावे,या उद्देशाने महाराष्ट्र राज्य माध्यमिक व उच्च माध्यमिक शिक्षण मंडळाने दहावी आणि बारावी बोर्डाच्या फेब्रु-मार्च २०२६ मधील परीक्षांच्या तारखा जाहीर केल्या आहेत.मंडळाने यंदाच्या परीक्षा दोन आठवडे आधी घेण्याचा निर्णय घेतला आहे.यानुसार, राज्यभरातील पुणे,नागपूर,छत्रपती संभाजीनगर,मुंबई, कोल्हापूर,अमरावती,नाशिक,लातूर व कोकण या नऊ विभागीय मंडळांमार्फत या परीक्षा आयोजित केल्या जाणार आहेत.त्यानुसार बारावी बोर्डाची लेखी परीक्षा मंगळवार,१० फेब्रुवारी २०२६ ते बुधवार,१८ मार्च २०२६ या कालावधीत संपन्न होईल.यामध्ये माहिती तंत्रज्ञान आणि सामान्यज्ञान विषयांच्या ऑनलाईन परीक्षांचा समावेश असेल.तर दहावी बोर्डाची लेखी परीक्षा शुक्रवार,२० फेब्रुवारी २०२६ ते बुधवार,१८ मार्च २०२६ या दरम्यान घेण्यात येणार आहेत.लेखी परीक्षांच्या आधी,बारावीच्या प्रात्यक्षिक,तोंडी आणि अंतर्गत मूल्यमापन परीक्षा २३ जानेवारी २०२६ ते ९ फेब्रुवारी २०२६ या दरम्यान होतील.तर, दहावीच्या प्रात्यक्षिक परीक्षा २ फेब्रुवारी २०२६ ते १८ फेब्रुवारी २०२६ या कालावधीत आयोजित करण्यात येतील.शिक्षण मंडळाचे सहसचिव प्रमोद गोफणे यांच्या सहीने हे वेळापत्रक जारी करण्यात आले असून,या परीक्षांचे विषयनिहाय सविस्तर अंतिम वेळापत्रक लवकरच मंडळाच्या अधिकृत संकेतस्थळावर जाहीर करण्यात येणार आहे.