वाघाच्या डरकाळीने गुराख्याचा घेतला जीव..

नागपूर :-वाघाच्या डरकाळीमुळे घाबरलेल्या बकऱ्यांपैकी एक तलावात शिरली.बकरी तलावात शिरताच बकरीला वाचविण्यासाठी गुराखीदेखील तलावात उतरला आणि त्याचा बुडून मृत्यू झाला असल्याची घटना देवलापार,ता.रामटेक पोलिस ठाण्याच्या हद्दीतील मुकनापूर शिवारात सोमवारी सायंकाळी घडली.

श्रीराम बावणे वय ६० वर्षे,रा.मुकनापूर,ता.रामटेक जि.नागपूर असे मृताचे नाव आहे.श्रीराम हा सोमवारी  गावाच्या शिवारातील तलावाच्या परिसरात नेहमीप्रमाणे बकऱ्या चारायला गेला होता. त्याच्यासोबत अन्य दोघेही बकऱ्या घेऊन गेले होते. सायंकाळी अचानक वाघाची डरकाळी ऐकायला आल्याने कळपातील बकऱ्या घाबरल्या आणि सैरावैरा पळत सुटल्या.एक बकरी मागे राहिल्याने श्रीराम तिला आणायला गेले.ती तलावात शिरताच तिला काढण्यासाठी ते तलावात उतरले आणि बुडाले.ते बुडत असल्याचे दिसताच दोघांनी आरडाओरड केली. माहिती मिळताच पोलिसांनी घटनास्थळ गाठून स्थानिकांच्या मदतीने त्यांचा तलावात शोध घेतला. अंधारामुळे थांबविलेली शोधमोहीम काल,मंगळवारी सकाळी पुन्हा सुरू करण्यात आली.सायंकाळी ४.३० वाजताच्या सुमारास त्यांचा मृतदेह शोधण्यात पोलिसांना यश आले.याप्रकरणी देवलापार पोलिसांनी अकस्मात मृत्यूची नोंद करून तपास सुरू केला आहे.