फक्त “Hi” असा संदेश पाठवा अन् ‘चॅटबॉट’ सेवेतून घरबसल्या मिळवा समाजकल्याण व मनरेगा योजनांची माहिती..

गडचिरोली :-जिल्ह्यातील नागरिकांनी घरबसल्या मनरेगा(रोजगार हमी योजना)व समाजकल्याण विभागाच्या योजनांची सविस्तर माहिती मिळवण्यासाठी जिल्हा परिषदेच्या नाविन्यपूर्ण चॅटबॉट सेवेचा लाभ घ्यावा,असे आवाहन जिल्हाधिकारी अविश्यांत पंडा यांनी केले आहे.फक्त “Hi” असा संदेश 8275309343 या क्रमांकावर पाठवल्यास विविध योजनांची माहिती आणि अर्जाचे नमुने सहज मिळू शकणार आहेत.या डिजिटल उपक्रमामुळे शासकीय योजनांची माहिती सहज आणि पारदर्शकपणे नागरिकांपर्यंत पोहोचविण्यात जिल्हा प्रशासनाला मोठे यश मिळणार असल्याचे जिल्हाधिकारी पंडा यांनी सांगितले.

आज,बुधवार ६ ऑगस्ट रोजी जिल्हाधिकारी यांच्या अध्यक्षतेखाली झालेल्या जिल्हा दिव्यांग कल्याण समितीच्या बैठकीत या अभिनव चॅटबॉट सेवेचे सादरीकरण करण्यात आले.यावेळी जिल्हा परिषदेचे मुख्य कार्यकारी अधिकारी सुहास गाडे,एकात्मिक आदिवासी विकास प्रकल्पाचे प्रकल्प अधिकारी रणजीत यादव,अतिरिक्त मुख्य कार्यकारी अधिकारी राजेंद्र भुयार,जिल्हा समाजकल्याण अधिकारी चेतन हिवंज,सामाजिक न्याय विभागाचे सहाय्यक आयुक्त डॉ.सचिन मडावी,जिल्हा दिव्यांग पुनर्वसन केंद्राचे प्रकल्प संचालक अभिजीत राऊत उपस्थित होते.

जिल्हा समाजकल्याण अधिकारी चेतन हिवंज यांनी सांगितले की,या चॅटबॉट सेवेच्या माध्यमातून मनरेगा व समाजकल्याण विभागाच्या सर्व योजनांची सुस्पष्ट माहिती,अर्ज प्रक्रिया आणि तांत्रिक मार्गदर्शन नागरिकांना उपलब्ध होईल.विशेष म्हणजे,ही सेवा सुरू करण्यासाठी जिल्हा परिषदेला केवळ दोन हजार रुपयांचा खर्च आल्याचेही त्यांनी नमूद केले.

या बैठकीत दिव्यांग नागरिकांच्या हितासाठी विविध उपाययोजनांचा आढावा घेण्यात आला.जिल्हा नियोजन समितीच्या माध्यमातून दिव्यांगांसाठी आवश्यक सुविधांचे नियोजन तसेच आगामी निवडणुकांमध्ये दिव्यांग मतदारांसाठी विशेष सुलभता निर्माण करण्याचे नियोजन या बैठकीत करण्यात आले.

या बैठकीपूर्वी जिल्हाधिकारी अविश्यांत पंडा व मुख्य कार्यकारी अधिकारी सुहास गाडे यांनी जिल्हा सामान्य रुग्णालय आवारातील दिव्यांग पुनर्वसन केंद्राला भेट देऊन तेथील सुविधांची पाहणी केली.बैठकीला विविध विभागाचे संबंधीत अधिकारी उपस्थित होते.