परतीच्या प्रवासात अपघात; वडील ठार,कुटूंबीय गंभीर जखमी..

गोंदिया :-मुलाच्या विवाह सोहळ्याची तयारी व खरेदीकरिता रायपूरला गेलेल्या दाम्पत्याचा परतीच्या प्रवासात अपघात होऊन वडील ठार झाले,तर ठार होणाऱ्यांची पत्नी,मुलगा,मुलगी व साळी गंभीर जखमी झाल्याची घटना मध्यरात्रीच्या सुमारास देवरी-आमगाव मार्गावरील डोंगरगाव सोनारटोला जवळ घडली.अशोक सत्यनारायण मोदी वय ५५ वर्षे,रा.आमगाव,जि.गोंदिया असे अपघातात ठार झालेल्या वडिलाचे नाव आहे.तर जखमींमध्ये अशोक यांची पत्नी सीमा अशोक मोदी वय ५० वर्षे,मुलगा आयुष अशोक मोदी वय २९ वर्षे,२५ वर्षीय मुलगी मुस्कान अशोक मोदी व साळी दीपा नितीन अग्रवाल असे अपघातात जखमी झालेल्यांची नावे असून जखमींवर गोंदिया येथील एका खासगी रुग्णालयात उपचार सुरू आहेत.

अशोक मोदी हे कारने कुटुंबीयांसह मोठ्या मुलाच्या विवाह सोहळ्याची तयारी व खरेदीकरिता रायपूरला गेले होते.कारने गुरुवारच्या रात्रीच्या सुमारास रायपूरवरून आमगावला कुटुंबासह परत येत असतांनाच अशोक मोदी यांचे वाहनावरील नियंत्रण सुटले आणि कार आमगाव-देवरी मार्गावरील डोंगरगाव जवळील सोनारटोलाच्या पुलावरील खांबावर जाऊन जोरदार धडकली.यात अशोक मोदी,त्यांची पत्नी सीमा मोदी, मुलगा आयुष मोदी,मुलगी मुस्कान मोदी व साळी दीपा अग्रवाल हे गंभीर जखमी झाले.जखमींना उपचारासाठी देवरी ग्रामीण रुग्णालयात नेत असतांना वाटेतच अशोक मोदी यांचा मृत्यु झाला.तर इतर जखमींवर प्राथमिक उपचार करुन पुढील उपचारार्थ गोंदिया येथील खासगी रुग्णालयात दाखल करण्यात आले.ऐन विवाह सोहळ्याच्या जवळच दुःखद घटना घडल्याने मोदी कुटूंबीय शोकसागरात बुडाले आहेत.