धावती कार पेटत राहिली अन् लोकं व्हिडिओ काढत राहिले..

नागपूर :-एका धावत्या कारने अचानकपणे पेट घेत अवघ्या काही मिनिटांतच जळून खाक झाल्याची घटना नागपूरच्या वर्धा रोडवरील जयप्रकाश मेट्रो स्टेशनजवळील डबलडेकर फ्लायओव्हरवर घडली. कार चालकाने प्रसंगावधान राखत पटकन उडी मारून बाहेर पडल्याने मोठा अनर्थ टळला.पण,धावती कार पेटत राहिली आणि काही लोकं मदत करण्याऐवजी व्हिडिओ काढत राहिल्याने माणुसकीची संवेदनशीलता उघड झाली.

अमजद खान इब्राहिम खान वय ३२,रा. बसंतनगर, पुसद,यवतमाळ हे एमएच २९ ०२८८ क्रमांकाच्या

स्वीफ्ट डिझायर कारने यशोधरानगर येथील रुग्णालयात नातेवाइकाला भेटून परत पुसदकडे जात होते.अश्यातच सायंकाळी ७.३० च्या सुमारास फ्लायओव्हरवर पोहोचताच कारच्या बोनटमधून धूर निघतांना दिसला. प्रसंगी त्यांनी तात्काळ वाहन रस्त्याच्या कडेला थांबवण्याचा प्रयत्न केला.मात्र,याचवेळी कारचे दरवाजे लॉक झाले.कसेबसे बाहेर पडताच काही क्षणांतच आगीने रौद्ररूप धारण केले आणि संपूर्ण कार पूर्णपणे जळून खाक झाली.या घटनेमुळे फ्लायओव्हरवर वाहनांची मोठी रांग लागून वाहतूक विस्कळीत झाली. दरम्यान,बेसा-पिपळा नगरपंचायतीच्या जलपुरवठा अभियंता पूजा जाधव या घरी जात असतांना अजनी ते एअरपोर्टदरम्यान फ्लायओव्हरवर कारला आग लागलेली दिसली.त्यांनी तात्काळ अग्निशमन विभागाला कळविले. तसेच अग्निशमन अधिकारी संकेत प्रमोद माटे यांनाही माहिती दिल्यानंतर तातडीने अग्निशमन वाहन घटनास्थळी रवाना केले.मात्र,काही जण मदत करण्याऐवजी व्हिडिओ काढण्यात व्यस्त होते. अग्निशमन दलाच्या बेसा-पिपळा व नरेंद्रनगर केंद्रातून दोन गाड्या घटनास्थळी दाखल होऊन आग आटोक्यात आणली.मात्र,तोपर्यंत कारचे मोठे नुकसान झाले होते.