‘झुंड’ चित्रपटात काम करणाऱ्या तरुणाची हत्या..!

नागपूर :-तीन वर्षांपूर्वी अमिताभ बच्चन मुख्य भूमिकेत असणारे नागराज मंजुळे दिग्दर्शित ‘झुंड’ चित्रपटात काम करणाऱ्या २१ वर्षीय तरुणाची हत्या करण्यात आल्याची घटना मंगळवारच्या मध्यरात्री जरीपटका पोलीस ठाण्याच्या हद्दीत घडली.प्रियांशु क्षत्रिय उर्फ बाबू छेत्री वय २१ वर्षे, रा.लुंबिनी नगर,मेकोसाबाग,नागपूर असे हत्या झालेल्या तरुणाचे नाव असून त्याच्यावर पोलीस रेकॉर्डवर विविध गुन्हे दाखल होते.तो गुन्हेगारी पार्श्वभूमीचा होता.सदरची हत्या ही वैयक्तिक वादातून झाल्याचा संशय पोलिसांनी व्यक्त केला आहे.प्रकरणी पोलिसांनी एका  ध्रुव शाहू नामक संशयित आरोपीला अटक केली आहे.

मंगळवार ७ ऑक्टोंबरच्या रात्री साडे दहा वाजताच्या सुमारास बाबू हा त्याच्या एका मित्रासोबत बाहेर गेला होता.पण रात्र होऊनही तो घरी परतला नव्हता.अश्यातच जरीपटका पोलिसांना मध्यरात्री कुणाची तरी हत्या झाल्याची माहिती मिळाली.त्यानुसार पोलिसांनी घटनास्थळ गाठून एक मुलगा वायरने बांधलेला तसेच शरीरावर चाकूसारख्या धारदार शस्त्राचे व्रण असल्याचे दिसून आला.लागलीच पोलिसांनी तात्काळ त्याला रुग्णालयात दाखल केले.मात्र,उपचारापूर्वीच डॉक्टरांनी त्याला मृत घोषित केले.सुरुवातीला तो कोण आहे; याची कल्पना पोलिसांना नव्हती.मृताबद्दलची माहिती घेतल्यावर तो बाबू छेत्री असल्याचे पोलिसांच्या लक्षात आले.त्यानंतर पोलिसांनी बाबूच्या कुटुंबीयांशी संपर्क साधून घटनेची माहिती दिली.बाबू छेत्री याच्यावर यापूर्वीही काही इतर गुन्हेगारी स्वरूपाचे खटले दाखल होते.प्रियांशुची बहीण शिल्पा क्षत्रियने दाखल केलेल्या तक्रारीच्या आधारे पोलिसांनी हत्येचा गुन्हा नोंदवून एका संशयितास ताब्यात घेतले आहे.झुंड’ हा चित्रपट विजय बारसे या निवृत्त शिक्षकाच्या आयुष्यावर आधारित होता. याचे दिग्दर्शन नागराज मंजुळे यांनी केले होते आणि चित्रपटात अमिताभ बच्चन यांनी मुख्य भूमिका साकारली होती.चित्रपटात नागपुरातील झोपडपट्टीतील काही मुलांना अभिनयाची संधी देण्यात आली होती. त्यातील एक बाबू होता.