छोटीशी डुलकी ठरली जीवघेणी; अपघातात आई आणि मुलाचा दुर्दैवी मृत्यू..

नागपूर :-कार चालवतांना चालकाला लागलेली एक छोटीशी डुलकी संपूर्ण कुटुंबासाठी जीवघेणी ठरली असून,या दुर्घटनेत आई आणि मुलाचा दुर्दैवी मृत्यू झाल्याची घटना आज,रविवार १ फेब्रुवारी रोजी सकाळी सव्वासहा वाजताच्या सुमारास समृद्धी महामार्गावर घडली.आशालता हनुमंत कणबर्गी वय ८३ वर्षे आणि मुलगा विकेकानंद कणबर्गी वय ५६ वर्षे अशी मृतक मायलेकांची नावे आहेत.दोघेही मायलेक ठाण्याहून नागपूरच्या दिशेने आपल्या कारने नागपूर कॉरिडॉरला जात होते.पहाटेच्या वेळी प्रवासाचा थकवा आणि झोपेमुळे चालकाचे कारवरील नियंत्रण सुटले आणि चॅनेज क्रमांक-३९/९०० जवळ मिडल लाईन मधील समोर चालत असलेल्या कंटेनरला कारची मागून धडक लागली.धडक इतकी भीषण होती की,कारचा समोरचा भाग कंटेनरच्या खाली घुसला आणि गाडीचा चक्काचूर झाला.यात कारमधील आशालता यांचा जागीच मृत्यू झाला.तर कारचालक विवेकानंद याला महामार्ग पोलीस रुग्णालयात नेत असतांना वाटेत मृत्यू झाला.घटनेची माहिती मिळताच महामार्ग पोलिस पथकातील  पोलीस उपनिरीक्षक दिलीप थाटे व प्रकाश चौधरी पथकासह घटनास्थळी दाखल झाले. घटनेनंतर समृद्धी महामार्गवरील वाहतूक काहीवेळ विस्कळीत झाली होती. महामार्ग पोलिसांनी तात्काळ दखल घेत क्रेनच्या सहाय्याने कारला बाजूला करत वाहतूक सुरळीत केली. सदर घटनेची नोंद सेलू पोलिस ठाण्यात करण्यात आली असून पुढील तपास सुरू करण्यात आला आहे.