गडचिरोलीत शिवसेना पदाधिकारी वेटींग लिस्टवर; प्रभारींकडेच कारभार.. – नव्या शिवसेना पदाधिकाऱ्यांच्या घोषणेची उत्सुकता शिगेला; चेंडू पक्षश्रेष्ठींकडे- डॉ.श्रीकांत बनसोड

गडचिरोली):-मागील कालावधीत शिवसेना (उद्धव बाळासाहेब ठाकरे)पक्षाच्या सोशल मीडियावर  झालेल्या अभूतपूर्व चिखलफेकीनंतर,विदर्भातील  पूर्वेकडील गडचिरोली जिल्ह्याच्या शिवसेना पक्षात नव्याने घोषित करण्यात आलेल्या प्रभारी पदाधिकाऱ्यांकडेच कारभार असल्याने नवे शिवसेना पदाधिकारी नियुक्तीच्या वेटींग लिस्टवर आहेत.या पार्श्वभूमीवर,गडचिरोली जिल्ह्यातील नियमित पदाधिकारी घोषित होणार की नाही? याबाबत उत्कंठा शिगेला पोहचली आहे.पक्षाची वज्रमूठ बांधण्यासाठी आणि जनसामान्यांची बाजू लावून धरण्याची क्षमता लक्षात घेऊनच पुढील निर्णय होणार असल्याची शक्यता वर्तवली जात आहे.अशातच सध्याच्या घडीला चेंडू हा पक्षश्रेष्ठींकडे असून,अंतिम निर्णय त्यांच्याच हातात असल्याचे माजी जिल्हा समन्वयक डॉ.श्रीकांत बनसोड यांनी स्पष्ट केले आहे.

शिवसेना ही अनादिकाळापासून सर्वसामान्यांचे प्रश्न तसेच अन्यायाविरुद्ध आवाज उठविण्याचे काम करीत आहे.अशातच पक्ष संघटन महत्त्वाचे असल्याने नव्या शिवसेना पदाधिकाऱ्यांच्या घोषणा करणेही तितकेच महत्त्वाचे आहे.गडचिरोलीत शिवसेनेच्या संघटनात्मक घडामोडींकडे पुन्हा एकदा राजकीय वर्तुळाचे लक्ष लागले असून,या निर्णयाने स्थानिक राजकारणात नवा रंग भरला जाणार कां,हेही पाहणे तितकेच उत्सुकतेचे ठरणार आहे.