उद्रेक न्युज वृत्त
गोंदिया :- नवेगावबांध पोलिस ठाण्यांतर्गत ग्राम कवठा येथील शेतशिवारात ३० मार्च रोजी सकाळी ८ वाजता एक महिला गळफास घेतलेल्या अवस्थेत आढळली. निवृत्ता चंद्रशेखर रामटेके वय ४० वर्षे रा.बोळदे-कवठा असे गळफास घेतलेल्या महिलेचे नाव आहे.
२९ मार्च रोजी सायंकाळी ७ वाजता तिचे पती चंद्रशेखर पांडुरंग रामटेके वय ४६ वर्षे हे बाहेरून घरी आल्यावर आपल्या मुलाला आंघोळीसाठी पाणी गरम कर,असे त्यांनी म्हटले.यावर निवृत्ता रामटेके हिने नवऱ्याला शिवीगाळ करून वाद घातला,तसेच रागाच्या भरात ती घराबाहेर निघून गेली.
बराच वेळ झाल्याने ती घरी परतली नसल्याने पती चंद्रशेखर रामटेके आणि गावकऱ्यांनी आजूबाजूला तिचा शोध घेतला,परंतु ती मिळून आली नाही. ३० मार्च रोजी सकाळी ८ वाजता गावापासून एक किलोमीटर अंतरावर असलेल्या बोळदे शेतशिवारातील नाल्याच्या काठावर बाभळीच्या झाडाला नारळाच्या दोरीने गळफास घेतलेल्या अवस्थेत तिचा मृतदेह मिळून आला.या घटनेसंदर्भात ३० मार्च रोजी नवेगावबांध पोलिसांनी आकस्मिक मृत्यूची नोंद केली आहे.तपास सहायक फौजदार अनंतराम तुलावी करीत आहेत.
