क्रीडा क्षेत्रातील खेळाडूंसाठी विभागीय स्तरावर कौशल्य चाचण्यांचे आयोजन.. – पात्र खेळाडूंची निवड होणार राज्यस्तर चाचणीसाठी..

गडचिरोली :-आंतरराष्ट्रीय दर्जाचे खेळाडू घडविण्याच्या उद्देशाने महाराष्ट्र शासनाच्या क्रीडा व युवक सेवा संचालनालय पुणे अंतर्गत राज्यात ९ क्रीडा प्रबोधिनी स्थापन करण्यात आल्या असून या प्रबोधिनीत प्रवेशासाठी कौशल्य चाचणी व सरळ प्रवेश प्रक्रियेअंतर्गत भरती प्रक्रिया राबविण्यात येत आहे.या भरती प्रक्रियेसाठी २६ ते २७ जून २०२५ या कालावधीत विभागीय स्तरावर कौशल्य चाचण्यांचे आयोजन करण्यात येणार असून,त्याद्वारे पात्र खेळाडूंची निवड राज्यस्तर चाचणीसाठी केली जाणार आहे.यात हँडबॉल (१३),जलतरण (७),सायकलिंग (३), फुटबॉल (७), ज्युदो (५) आणि जिम्नॅस्टिक (९) या क्रीडा प्रकारांमध्ये खेळाडूंसाठी रिक्त जागा उपलब्ध आहेत.७ जुलै २००६ नंतर जन्मलेले व ८ जुलै २०२५ रोजी वय १९ वर्षांपेक्षा कमी असलेले खेळाडू या निवड प्रक्रियेस पात्र ठरणार आहेत.निवड झालेल्या खेळाडूंना शासकीय खर्चावर निवासी प्रशिक्षण, शालेय शिक्षण,संतुलित आहार,निवास व्यवस्था तसेच आधुनिक क्रीडा सुविधा विनामूल्य पुरविल्या जाणार आहेत.राज्यस्तरावर पदक प्राप्त किंवा राष्ट्रीय स्तरावर सहभागी खेळाडूंना त्यांच्या संबंधित खेळामध्ये तज्ञ समितीसमोर थेट चाचणी घेऊन प्रवेश देण्यात येईल. राज्यस्तरावर केवळ सहभागी असलेल्या खेळाडूंना खेळनिहाय कौशल्य चाचणीच्या आधारे गुणवत्तेनुसार प्रवेश दिला जाईल.या प्रक्रियेसाठी इच्छुक खेळाडूंनी येत्या २३ जून २०२५ पर्यंत विहीत नमुन्यातील अर्ज जिल्हा क्रीडा अधिकारी कार्यालय,कॉम्प्लेक्स एरिया, गडचिरोली येथे सादर करावा.अर्जासोबत नाव, जिल्हा,खेळप्रकार,जन्मतारीख,वय आणि क्रीडा कामगिरीसंबंधित आवश्यक कागदपत्रांची जोड द्यावी, असे आवाहन जिल्हा क्रीडा अधिकारी भास्कर घटाळे यांनी केले आहे.