कोरेगावची सपना लाडे तर भेंडाळा येथील राहुल वैरागडेची जिल्हा युवा पुरस्कारासाठी निवड..

गडचिरोली :-महाराष्ट्र शासनाच्या क्रीडा धोरण २०१२ अंतर्गत व राज्य युवा धोरण २०१२ अन्वये जिल्ह्यातील युवक व युवतींच्या समाजहिताच्या उल्लेखनीय कार्याचा गौरव करण्यासाठी दरवर्षी जिल्हास्तरावर “जिल्हा युवा पुरस्कार” प्रदान करण्यात येतो.जिल्हा क्रीडा अधिकारी कार्यालय,गडचिरोली यांच्यातर्फे सन २०२३-२४ या वर्षासाठी पुरस्कारार्थींची घोषणा करण्यात आली आहे.त्यानुसार युवक विभागात राहुल संजय वैरागडे रा.भेंडाळा, ता.चामोर्शी तर युवती विभागात कु.सपना सुधाकर लाडे रा.कोरेगाव,ता.देसाईगंज यांची निवड करण्यात आली आहे.दोन्ही पुरस्कारार्थींना प्रत्येकी १० हजार रुपये,स्मृतिचिन्ह व प्रमाणपत्र देऊन गौरविण्यात येणार आहे.सदरचा पुरस्कार गुरुवार १ मे २०२५ रोजी महाराष्ट्र दिनाच्या समारंभात पोलीस मुख्यालय परेड मैदान गडचिरोली येथे मान्यवरांच्या हस्ते प्रदान केला जाणार आहे.

पाणपोई उभारणे,सामान्य ज्ञान स्पर्धांचे आयोजन,गुणवंत विद्यार्थी सत्कार, वनराई बंधारा बांधणे,पक्षी संवर्धन, वृक्षारोपण,वनसंवर्धन, कोरोनावरील जनजागृती पथनाट्य सादरीकरण,क्रीडा स्पर्धा आयोजन,मतदार जनजागृती,रक्तदान शिबीर,पूरग्रस्त मदतकार्य,स्वच्छता मोहीम व अंधश्रद्धा निर्मूलन अशा विविध सामाजिक उपक्रमांत सक्रीय सहभाग घेतला आहे.

आरोग्य शिबिरे, “केच द रेन” अभियान,स्वयंसेवक नोंदणी,अ‍ॅनिमिया तपासणी कॅम्प, “माझी माती माझा देश”, “हर घर तिरंगा”, जल जीवन मिशन,पक्षी संवर्धन,वृक्षारोपण, कोविड-१९ लस शिबिरे,तालुका क्रीडा स्पर्धा,मतदार जनजागृती,व्यसनमुक्ती,स्वच्छता व अंधश्रद्धा निर्मूलन,पोषक आहार प्रचार असे विविध उपक्रम राबवले आहेत.

या दोन्ही युवक-युवतींच्या उल्लेखनीय कार्याची दखल घेऊन त्यांना सन २०२३-२४ चा जिल्हा युवा पुरस्कार प्रदान केला जाणार असल्याची माहिती जिल्हा क्रीडा अधिकारी भास्कर घटाळे यांनी दिली आहे.