आवाज वाढाव डीजे तुला आईची शप्पत हाय..! असे म्हणणाऱ्या डीजेवर कारवाई..

गोंदिया :-डीजे म्हटला की,न थिरकणारेही डीजेच्या तालावर नाचू लागतात.नाच,गाणी ठीक आहे; परंतु यावर काही मर्यादाही असणे गरजेचे आहे.काहीजण मर्यादेपलीकडे जाऊन रात्री बेरात्री डीजे वाजवीत असतात.अश्याच प्रकारे रात्री डीजे वाजविण्यावर बंदी असतांनाही मोठ्या आवाजात डीजे वाजविणे एका डीजेवाल्याच्या अंगलट आले आहे.प्रकरणी त्याच्याविरोधात गोंदिया ग्रामीण पोलिसांनी गुन्हा नोंदविला आहे.

जिल्हाधिकाऱ्यांनी १ जानेवारीला आदेश पारीत करून ठराविक वेळेनंतर डीजे वाद्य वाजविण्यावर आणि आवाजावरही बंदी घातली आहे.त्याची जिल्ह्यात काटेकोर अंमलबजावणी केली जात आहे. अशा तक्रारी आल्यास पोलिस डीजे मालकांवर कारवाई करीत आहेत.गोंदियानजीक असलेल्या चुलोद येथील घनश्याम पटले रा. चुलोद यांच्या घरी लग्नाच्या हळदीचे कार्यक्रम होते.त्या कार्यक्रमात बुधवारी १५ जानेवारीच्या रात्री १ वाजेपर्यंत मोठ्या आवाजात डीजे वाजविण्यात येत होता.याची तक्रार पोलिसांकडे आली.पोलिसांनी तात्काळ चुलोद गाठून डीजे मालक ललीत ओमकार पतेह वय २५ वर्षे, रा. भानपूर याच्याविरोधात गुन्हा दाखल करून २५ हजार रुपये किंमतीचा एमप्लपायर मशीन आणि १५ हजार रुपये किंमतीचा डबलबेस जप्त केला.प्रकरणी गोंदिया ग्रामीण पोलिस ठाण्यात गुन्हा दाखल करण्यात आला आहे.