आता वाहनचालकांसाठी फास्टॅग आधारित वार्षिक पास होणार सुरू..

उद्रेक न्युज वृत्त :-टोलनाक्यांवरील वेळ कमी करणे, वाहतूक कोंडीतून सुटका करणे आणि टोल प्लाझावरील वाद कमी करणे यासह लाखो खासगी वाहन मालकांना जलद आणि सुलभ प्रवासाचा अनुभव देण्यासाठी आता लवकरच वाहनचालकांसाठी फास्टॅग आधारित वार्षिक पास सुरू होणार आहे.या नव्या योजनेंतर्गत वाहनधारकांना तीन हजार रुपयात वर्षभर (२०० ट्रीप) टोलमुक्त प्रवास करता येणार आहे.सदरची योजना ही १५ ऑगस्ट २०२५ पासून लागू होणार असल्याचे केंद्रीय रस्तेवाहतूक व महामार्ग मंत्री नितीन गडकरी यांनी आज,बुधवार१८ जून रोजी सोशल मीडियावरील एका पोस्टद्वारे फास्टॅग (FASTag)बद्धलची घोषणा केली आहे.सदरची पास केवळ गैर-व्यावसायिक खासगी वाहनांसाठी उपलब्ध असेल.पास सक्रिय केल्याच्या तारखेपासून एक वर्षासाठी किंवा २०० फेऱ्या पूर्ण होईपर्यंत (यापैकी जे आधी घडेल) वैध राहील.वार्षिक पासमुळे देशभरातील राष्ट्रीय महामार्गावरून सहज आणि किफायतशीर प्रवास करता येईल,असे गडकरींनी म्हटले आहे.वार्षिक पास सक्रिय करण्यासाठी किंवा नूतनीकरणासाठी एक स्वतंत्र लिंक लवकरच हायवे ट्रॅव्हल ॲप आणि NHAI/MORTH वेबसाइटवर उपलब्ध करून दिली जाणार आहे.नागरिक ही लिंक सुरू झाल्यानंतर या अधिकृत ॲपद्वारे पास ॲक्टिवेट करू शकतील.तसेच NHAI (राष्ट्रीय महामार्ग प्राधिकरण) आणि रस्ते वाहतूक मंत्रालयाच्या अधिकृत वेबसाईट्सवरूनही पास मिळवता येईल.