आणखी दोन नक्षलवादी ठार; एक जवान शहीद..

गडचिरोली :-नक्षलविरोधी अभियान राबवित असतांना सुरक्षा दलाचे जवान व नक्षलवाद्यांमध्ये उडालेल्या चकमकीत एका नक्षलवाद्याचा खात्मा करण्यात आला होता.अश्यातच परिसरात शोध मोहिमेदरम्यान आणखी दोन नक्षलवाद्यांचे मृतदेह सापडल्याने तीन नक्षलवाद्यांचा खात्मा करण्यात पोलिसांना यश आले आहे; मात्र,यात एक जवान शहीद झाला.तर एक जवान गंभीर जखमी झाला आहे.चकमकीत ठार झालेल्या नक्षलवाद्यांची अद्याप ओळख पटायची आहे.चकमकीत गंभीर जखमी  सी-६० पथकाचा जवान दीपक चिन्ना मडावी वय ३८ वर्षे,रा.मांड्रा(दामरंचा),ता.अहेरी,जि.गडचिरोली यास आज शुक्रवारी पहाटे हेलिकॉप्टरने भामरागड येथे नेण्यातआले.मात्र,त्यांचे उपचारादरम्यान निधन झाले.तर जोगा मडावी,रा.किष्टय्यापल्ली हा जवान गोळी लागल्याने जखमी झाल्याने त्यांना रुग्णालयात भरती करण्यात आले असून सध्या प्रकृती स्थिर आहे.

मंगळवार ३ फेब्रुवारीच्या संध्याकाळी कंपनी क्रमांक १० चे नक्षलवादी आणि छत्तीसगडमधील काही नक्षली फोदेवाडा परिसरातील जंगल परिसरात छपून बसल्याची माहिती मिळताच भामरागडच्या उपविभागीय पोलिस अधिकाऱ्यांच्या नेतृत्वात सी-६० पथकाच्या जवानांनी नक्षलविरोधी अभियान राबविण्यास सुरुवात केली. बुधवार ४ फेब्रुवारीला दिवसा झालेल्या चकमकीत पोलिसांनी नक्षल्यांचे दोन तळ उद्ध्वस्त केले.त्यानंतर काल गुरुवारी सकाळपासून पुन्हा सी-६० पथक,केंद्रीय राखीव दल व जलद प्रतिसाद पथकाच्या जवानांनी नक्षलविरोधी अभियान राबविण्यास प्रारंभ केला.यावेळी नक्षल्यांशी जोरदार चकमक उडाली.पोलिसांनी घटनास्थळावरुन एका नक्षल्याचा मृतदेह ताब्यात घेतला होता.पुन्हा दोन नक्षल्यांचे मृतदेह पोलिसांना सापडले. यात दोन पुरुष व एका महिला नक्षलीचा समावेश आहे. घटनास्थळावरून पोलिसांनी एक एके ४७ व एक एसएलआर रायफल जप्त केली आहे.