आज आणि उद्या गडचिरोलीत संविधानाचा जागर.. – प्रसिध्द गायीका कडुबाई खरात व प्रसिध्द शाहिरा सीमा पाटील मुंबई यांचे कार्यक्रम..

गडचिरोली :-सांस्कृतिक कार्य विभाग,सांस्कृतिक कार्य संचालनालय,महाराष्ट्र शासन यांच्या वतीने  भारतीय संविधान अमृत महोत्सव वर्षानिमित्त आज,गुरुवार १६ ऑक्टोंबर व उद्या,शुक्रवार १७ ऑक्टोंबर रोजी सायंकाळी ६ वाजता सुमानंद सभागृह,आरमोरी रोड गडचिरोली येथे सांस्कृतिक कार्यक्रमांचे आयोजन करण्यात आले आहे.

भारतीय संविधान सभेने भारतीय राज्यघटना स्वीकारली व ती २६ जानेवारी १९५० रोजी अंमलात आली.हा दिवस प्रत्येक भारतीयांसाठी महत्त्वाचा आहे,कारण या दिवशी जगातील सर्वात मोठी लिखित राज्यघटना स्वीकारण्यात आली,जी भारताच्या लोकशाही व्यवस्थेचा कणा आहे.सांस्कृतिक कार्य मंत्री अ‍ॅड.आशिष शेलार यांच्या संकल्पनेतून भारतीय संविधान अमृत महोत्सव वर्षानिमित्त भारतीय संविधानावर आधारित विविध कार्यक्रमांचे आयोजन करण्यात येत आहे. ‘जागर संविधानाचा’ हा सांस्कृतिक कार्य संचालनालय,महाराष्ट्र राज्य यांच्याद्वारे आयोजित एक सांस्कृतिक कार्यक्रम आहे, जो भारतीय संविधानाबद्दल जागरूकता वाढवण्यासाठी आणि संविधानाच्या अमृतमहोत्सवी वर्षाच्या निमित्ताने आयोजित केला जातो.या कार्यक्रमांमध्ये संगीत,नाट्य यांसारख्या विविध कलांचा समावेश आहे.

सांस्कृतिक कार्य विभागामार्फत संविधानाच्या अमृत महोत्सव वर्षानिमित्य राज्याभरात सुरु असलेल्या विविध सांस्कृतिक कार्यक्रमाचा एक भाग म्हणून गडचिरोली शहरात देखील याचे आयोजन करण्यात आले आहे.यात आज,गुरुवार १६ ऑक्टोंबर रोजी प्रसिध्द गायीका कडुबाई खरात आणि त्यांची चमू संविधानावर आधारित गीतांचे सादरीकरण करतील,महामानव डॉ.बाबासाहेब आंबेडकर यांच्या जीवन प्रवासाचा जागर गीतांमधून सादर करणार आहेत.तर उद्या १७ ऑक्टोंबर रोजी संविधानावर आधारित संगीतमय नाट्याचे सादरीकरण मुंबईचे प्रसिध्द शाहिरा सीमा पाटील आणि त्यांचा संच करणार आहे.या दोन्ही दिवसांचे कार्यक्रम सर्वांसाठी विनामूल्य असून जास्तीत जास्त रसिकांनी या कार्यक्रमांचा आनंद घ्यावा,असे आवाहन सांस्कृतिक कार्य संचालनालयाचे संचालक,बिभीषण चवरे यांनी केले आहे.