अज्ञात वाहनाची बिबट्याच्या जबड्याला धडक; बिबट्याचा मृत्यू..

नागपूर :-अज्ञात वाहनाच्या धडकेत एका बिबट्याचा (मादी) मृत्यू झाल्याची घटना काल,रविवारी नागपूर वनविभागाच्या हद्दीतील रामटेक वनपरिक्षेत्रांतर्गत येणाऱ्या कांद्री मनसर-जबलपूर महामार्गावर घडली.

मृत बिबट्याचे वय ५ वर्षे असल्याचा अंदाज आहे.

घटनास्थळ पेंच व्याघ्र प्रकल्पाला लागूनच आहे. त्यामुळे महामार्ग ओलांडून पलीकडे जात असतांना बिबट्याचा अपघात झाला असावा अशी शक्यता वर्तवली जात आहे.महामार्ग ओलांडत असतांना अज्ञात वाहनाने बिबट्याच्या जबड्याला धडक दिली. त्यामुळे गंभीर जखमी झालेल्या बिबट्याचा जागीच मृत्यू झाला.याबाबत माहिती मिळताच रामटेक वनपरिक्षेत्र अधिकारी अनिल भगत व वनकर्मचाऱ्यांचे पथक घटनास्थळी पोहोचले. पंचनामा केल्यानंतर राष्ट्रीय व्याघ्र प्राधिकरणाच्या मार्गदर्शक सूचनांनुसार मृत बिबट्यावर अंत्यसंस्कार करण्यात आले.