उद्रेक न्युज वृत्त
मुख्य संपादक/सत्यवान रामटेके
कोंढाळा(देसाईगंज) :- देसाईगंज तालुक्याच्या कोंढाळा ग्रामपंचायतीचे अँड्रॉइड मोबाईल एका अज्ञात चोरट्याने ग्रामपंचायत कार्यालयातून चोरून नेले असल्याची घटना काल,मंगळवार दिनांक-२ जुलै रोजी दुपारी २ वाजेच्या सुमारास घडली.याबाबत ग्रामपंचायतीच्या वतीने अज्ञात चोरट्या विरुद्ध देसाईगंज पोलीस ठाण्यात सायंकाळपर्यंत तक्रार दाखल केली असून त्वरित सायबर सेलकडे प्रकरण वळती करण्यात आले आहे.
प्राप्त माहितीनुसार,मुख्यमंत्री-माझी लाडकी बहीण योजनेच्या कागदपत्रांची जुळवाजुळव करण्याकरिता गावातील नागरिकांची झुंबड रहिवासी प्रमाणपत्र,जन्म प्रमाणपत्र व इतर कागद पत्रांसाठी कोंढाळा ग्रामपंचायत कार्यालयात सकाळ पासून ते सायंकाळपर्यंत दिसून येत आहे.अशातच काल, मंगळवारी कार्यालयातील कर्मचारी कामात व्यस्त असतांना टेबलावर ठेवलेला ग्रामपंचायतीचा अँड्रॉइड मोबाईल अज्ञात चोरट्याने चोरून नेला आहे.सदर मोबाईल हा मागील वर्षाच्या डिसेंबर महिन्यात खरेदी करण्यात आला होता.एखादा प्रमाणपत्र काढण्यासाठी मोबाईलवर ओटीपी जात असतो. त्यामध्ये ग्रामपंचायतीची संपूर्ण माहिती संकलित करण्यात आली असून इतरांना त्याचा काहीही उपयोग होणार नाही. गडचिरोली जिल्ह्याच्या सायबर सेलकडे याबाबत तक्रार गेली असल्याने ‘तो’ मोबाईल चोरटा कोण? हे लवकरच कळणार आहे.ज्या व्यक्तीने मोबाईल चोरून नेला असेल,त्यांनी कोंढाळा ग्रामपंचायत कार्यालयात आणून देण्याचे करावे; अन्यथा ग्रामपंचायत आवारातील लावण्यात आलेल्या सिसीटिव्ही कॅमेरा च्या माध्यमातून शोध घेऊन संबंधित चोरट्याला जेलची हवा खावी लागेल; अशी माहिती ग्रामपंचायतीच्या सरपंचा अपर्णा राऊत यांनी दिली आहे.
